​បាល់ទាត់៖ ​ក្លិប​ជប៉ុន Vissel Kobe បាន​កក់​កៅអី​នៅ​វគ្គ ៨ក្រុម​ចុងក្រោយ​នៃ​ក្របខណ្ឌ​ក្លិប​កំពូល​អាស៊ី AFC Champions League ហើយ​ក្រោយ​យកឈ្នះ​ក្រុម​រួម​លី​គជ​ប៉ុន Yokohama F.Marinos ៣-២​។ ​​ការប្រកួត​នៅ​កីឡដ្ឋាន World Cup, Saitama ក្រុម Vissel Kobe បាន​បើក​ការនាំ​មុខ​នៅ​នាទី​ទី៧ ដោយ Nanasei Iino តែ​ក៏ត្រូវ Yokohama តាម​ស្មើ​វិញ​ពីរ​នាទី​បន្ទាប់​ដោយ Takuma Nishimura​។​

​​ក្រោយមក Vissel ក៏មាន​ឱកាស​នាំមុខ​សាជាថ្មី​ដោយ​បាល់​ពិន័យ ១១ម៉ែត្រ​របស់ Daiju Sasaki បន្ទាប់ពី​កំហុស​បាល់​ប៉ះ​ដៃ​របស់ Yuki Saneto​។​ ​​ឈានដល់​វគ្គ​ទី២ ហើយ​ការប្រកួត​នៅសល់តែ ១០នាទី Vissel Kobe កាន់តែ​កក់ក្តៅ​នៅពេល Yutaro Oda បន្ថែម​ការនាំ​មុខ ៣-១ មុនពេល​ដែល Yokohama តប​បាន​មួយ​គ្រាប់​វិញ​ដោយ Anderson Lopes នាទី​ទី៨៩​។ ​​Vissel Kobe ដែល​បច្ចុប្បន្នកំពុង​ឈរ​លេខ៣ រាប់​ពី​បាត​តារាង​មកវិញ​នៅ​លី​គ​កំពូល​ជប៉ុន​ត្រូវ​ឡើង​វគ្គ ៨ក្រុម​ចុងក្រោយ ​ខណៈ Yokohama ខកខាន​ឡើង​វគ្គ ៨ក្រុម​ចុងក្រោយ ACL ពី​រដូវ​កាល​ជាប់​គ្នា​។

​​ងាក​មក​មួយ​ប្រកួត​ទៀតក្រុម​កូរ៉េ Jeonbuk Motors បាន​បន្តដំណើរ​ឡើង​វគ្គ ៨ក្រុ​មុ​ចុងក្រោយ​ផងដែរ​ក្រោយ​យកឈ្នះ​ក្រុម​រួម​លី​គ Daugu FC​។ ​​ក្រុម​ទាំងពីរ​បញ្ចប់ ៩០នាទី​ដោយ​លទ្ធផល ១-១ បន្ទាប់ពី Jeonbuk នាំមុខ​មួយគ្រា​ប់​មុន​នៅ​នាទី​ទី៤៦ ដោយ Song Min Kyu មុនពេល​ដែល Daegu FC តាម​ស្មើ​វិញ​នៅ​នាទី​ទី៥៦ ដោយ Zeca​។ ​​ឈានដល់​វគ្គ​បន្ថែម ១៥នាទី​ពីរដង Jeonbuk ធ្វើឱ្យ Daegu កកឈាម​នៅពេល Kim Jin Gyu រកបាន​គ្រាប់​ជ័យជំនះ​នៅ​នាទី​ទី១២០+១ ជិត​ចប់ទៅហើយ​។ ​​នៅសល់​ពីរ​ប្រកួត​ទៀត​ធ្វើឡើង​ថ្ងៃនេះ​ដែលជា​ជំនួប​រវាង BG Pathum United ជួប Kitchee FC និង Johor Darul Ta’Zim ជួប Urawa Red Diamonds៕

​អត្ថបទ​៖​នាង សុភា​វុ​ធ