ភ្នំពេញ៖ វេជ្ជបណ្ឌិត សេង ចាន់ណា ប្រធានផ្នែកបច្ចេកទេសជំងឺទូទៅ នៃមណ្ឌលសុខភាពដូនពេញ តាមរយៈBTV ព័ត៌មាន នាព្រឹកថ្ងៃទី១៩ ខែសីហា ឆ្នាំ២០២២នេះ បានស្នើដល់មាតា បិតា ដែលមាន​កូនទើប​នឹងកើត រហូតដល់អាយុក្រោម២ឆ្នាំ មកចាក់វ៉ាក់សាំងការពារកូនពីជំងឺ​សំខាន់ៗ១១មុខ។

វេជ្ជបណ្ឌិត សេង ចាន់ណា បានបន្តទៀតថា មណ្ឌលសុខភាពដូនពេញ បានយកចិត្តទុកដាក់​ជា​សំខាន់​លើ​សុខភាព​មាតា និងទារក គឺការផ្តល់ថ្នាំបង្ការជូនកុមារទើបនឹងកើត រហូតដល់១៨ខែ ហើយវ៉ាក់សាំងនោះបានការពារសុខភាពកុមារ ដូចជា៖ ការពារជំងឺរលាកសួតថ្លើមប្រភេទបេ, ការពារជំងឺរបេង, ការពារជំងឺគ្រុនស្វិតដៃជើង, ការពារជំងឺក្អកមាន់ ខាន់ស្លាក់ តេតាណូស រលាក​ស្រោមខួរក្បាល ហ៊ីប និងការពារជំងឺរលាកសួត-រលាកស្រោមខួរក្បាលដោយភ្នើម៉ូកូក, ការពារ​ជំងឺ​កញ្រ្ជិល ស្អូចលើកទី១ ការពារជំងឺរលាកខួរក្បាលជេអ៊ី។

ជាចុងក្រោយវេជ្ជបណ្ឌិត សេង ចាន់ណា ដែលមានអាយុជិត៧០ឆ្នាំ និងបានបម្រើការងារលើវិស័យ​សុខាភិបាលមានរយៈពេលជាង២៣ឆ្នាំកន្លងមក ​ដោយបានបញ្ចប់ការសិក្សានៅសាលាពេទ្យ ក្នុង​ឆ្នាំ១៩៨៨ជាពិសេសសុខភាពរបស់គាត់​ អាច​ទ្រាំទ្រ​បាន ​គឺវេជ្ជបណ្ឌិតរូបនេះ បានប្តេជ្ញាចិត្តចូលរួម​ចំណែកក្នុងសង្គម ​ដើម្បីលើក​កម្ពស់​សុខភាព​មាតា ​និងទារក ​ឲ្យកាន់តែប្រសើរឡើងបន្ថែមទៀត៕

អត្ថបទ រដ្ឋា