ភ្នំពេញ៖ បុរសម្នាក់ ដែលត្រូវបានគេដឹងថា ជាមេគំនិតបំផុសបំផុលចលនាទន្រ្ទានកាន់កាប់ដីព្រៃ​របស់រដ្ឋ ក្នុងដែនឧទ្យានជាតិ ជួរភ្នំក្រវាញខាងត្បូង ក្នុងឃុំ-ស្រុកកំពង់សីលា ខេត្តព្រះសីហនុ បាន​ចូលសារភាពទោសកំហុស​ នៅសាលាដំបូងខេត្តព្រះសីហនុ កាលពីថ្ងៃទី១៨ ខែសីហាម្សិលមិញ ។

ក្រោយពីមានការអំពាវនាវរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងពិធីចែកសញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ កាលពីថ្ងៃទី១៧ ខែសីហា នេះ ឱ្យអ្នកដែលបានដឹកនាំចលនាទន្ទ្រានដី រដ្ឋដោយខុសច្បាប់ចូលសារភាពនោះ និងដកខ្លួនចេញនោះ លោក ផុន ផេន ដែលគេស្គាល់ថា មេខ្លោងម្នាក់នោះ​ ចូលខ្លួនសារភាព និងបានសុំអភ័យទោស​ពី​សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា និងអាជ្ញាធរខេត្ត ចំពោះការប្រព្រឹត្ត ខុសរបស់ខ្លួន​ក្នុងការ​ទន្ទ្រានយកដីព្រៃរបស់រដ្ឋ។

លោក បានអំពាវនាវដល់ពលរដ្ឋទាំងអស់ កុំឱ្យយកតម្រាប់​តាម ​និង​ឈប់​ទន្ទ្រានកាន់កាបដីព្រៃ​របស់​រដ្ឋ​តទៅ​ទៀត ​ហើយ​នាំគ្នាចូលរួមថែ​រក្សា​ព្រៃឈើទាំងអស់គ្នា ដើម្បីប្រយោជន៍​មនុស្សជាតិ​ទាំងអស់៕អត្ថបទ៖ គង់ ប៊ុនថា