ក្រចេះ៖ កូនត្រី និងត្រីមេពូជជាង៤ម៉ឺនក្បាល ត្រូវបានអាជ្ញាធរខេត្តក្រចេះ ព្រះសង្ឃ ព្រមទាំង​ប្រជាពលរដ្ឋ លែងចូលទៅក្នុងបឹងធម្មជាតិ កាលពីថ្ងៃទី១៨ ខែសីហា ម្សិលមិញ ដើម្បី​អបអរ​សាទរទិវា មច្ឆជាតិ ១កក្កដា និងដើម្បីចូលរួម លើកស្ទួយធនធាន​មច្ឆជាតិ​ឱ្យកាន់​តែ​សម្បូរថែមទៀត។

លោក ទ្រី សុភ័ក្ត្រ ប្រធានមន្ទីរកសិកម្ម រុក្ខាប្រមាញ់ ​និងនេសាទ ​ខេត្តក្រចេះ ​បាន​ឲ្យដឹងថា ទិវា​មច្ឆជាតិ​ថ្នាក់ខេត្ត ​ត្រូវបាន​ធ្វើឡើង​នៅបរិវេណ​បឹងរំអិល ក្នុងឃុំសំបុក ស្រុកចិត្របុរី ដែលក្នុងពិធីនេះ កូនត្រី សរុបចំនួន៤ម៉ឺនក្បាល និងត្រីមេពូជ ចំនួន១៥គីឡូក្រាម ​ត្រូវបានលែងចូលបឹង រួមមាន ត្រីប្រា ត្រីឆ្ពិន ត្រី កាហែ ត្រីក្អែក អន្ទង់ ត្រីរ៉ស់ និងត្រីក្រាញ់ ដើម្បីបង្កើនផលស្តុកនៅក្នុងធម្មជាតិ​ឱ្យកាន់តែសម្បូរឡើងថែមទៀត សម្រាប់ប្រើប្រាស់ក្នុងសហគមន៍ ។

លោក ប៉ែន លីណាត​ អភិបាលរងខេត្តក្រចេះ ​បានលើកឡើងថា ​មានកំណើនប្រជាពលរដ្ឋយ៉ាង ឆាប់រហ័ស ​បានដាក់សម្ពាធយ៉ាងធ្ងន់បន្ថែមទៀត ធ្វើឲ្យមានផលប៉ះពាល់​ជា​អវិជ្ជមានដល់ធនធាន​ជលផល និងធនធានធម្មជាតិ​ផ្សេងៗទៀត ​ដែលជា​ឧបសគ្គ​ចម្បង​ក្នុងការធ្វើឲ្យបានសម្រេច​តាម​ផែនការ​ប្រើប្រាស់​អភិវឌ្ឍន៍​ធនធានជលផល និង​ធនធានធម្មជាតិដទៃទៀត ​ប្រកបដោយចីរភាព។ ដូច្នេះប្រជាសហគមន៍ ត្រូវចូលរួមថែរក្សាឲ្យបានល្អទាំងអស់គ្នា ​កុំប្រើប្រាស់ឧបករណ៍នេសាទ​ល្មើស​ច្បាប់ ក្នុងការធ្វើនេសាទជាពិសេស គឺ​ឧបករណ៍ឆក់ ស្បៃមុង ​និងសាច់អួនក្រឡាញឹក (សាច់ប៉ាក់)​ និងឧបករណ៍នេសាទ ​ខុសច្បាប់ទាំងឡាយ ​ដែលច្បាប់បានហាមឃាត់ ៕ អត្ថបទ៖ សេង ម័រ