ភ្នំពេញ៖ ដូចការគ្រោងទុកនៅថ្ងៃទី១៩ ខែសីហានេះ ​មជ្ឈមណ្ឌលសកម្មភាពកំចាត់មីនកម្ពុជា (CMAC) និងទីភ្នាក់ងារសហប្រតិបត្តិកាអន្តរជាតិនៃប្រទេសជប៉ុន (JICA) បានចុះហត្ថលេខាក្នុង​គម្រោង​ស្តីពីការស្រាវជ្រាវ​ត្រៀមរៀបចំ​សាងសង់​ហេដ្ឋា​រចនា​សម្ព័ន្ធរូបវ័ន្ត និងសារមន្ទីរសន្តិភាព​សកម្មភាពមីនរបស់មជ្ឈមណ្ឌលសកម្មភាពកំចាត់មីនកម្ពុជា ​ស្ថិតនៅខេត្តសៀមរាប។

ពិធីចុះហត្ថលេខានេះធ្វើឡើងនៅទីស្នាក់ការ CMAC ក្រោមអធីបតីភាពឯកឧត្តម​ ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ ​និងលោកស្រី KOMUKAI ERI ប្រធាន​ក្រុមរៀបចំការស្រាវជ្រាវបឋមពីភ្នាក់ងារសហប្រតិបត្តិកាអន្តរជាតិនៃប្រទេសជប៉ុន (JICA)។

នៅក្នុងឱកាសនោះ ឯកឧត្តម ហេង រតនា មានប្រសាសន៍ថា គោលបំណងនៃគម្រោង គឺដើម្បីកែ​លម្អ​បរិយាកាស​អប់រំ បណ្តុះបណ្តាលសម្រាប់មន្រ្តីបុគ្គលិកដែលពាក់ព័ន្ធ​នឹងសកម្មភាពមីន មិន​ត្រឹមតែ​នៅក្នុងមជ្ឈមណ្ឌល​សកម្មភាព​កំចាត់មីន​កម្ពុជាប៉ុណ្ណោះទេ ប៉ុន្តែក៏មានស្ថាប័នពាក់ព័ន្ធផ្សេង​ទៀត​ទាំងនៅក្នុងប្រទេសកម្ពុជា ​និងប្រទេសដែលរង​ផល​ប៉ះពាល់​ដោយសារមីន​ផ្សេងទៀត​ផងដែរ។

បន្ថែមពីនេះ​ក៏នឹងលើកកម្ពស់ការយល់ដឹងអំពីបញ្ហាទាក់ទងនឹងគ្រាប់មីន ​និងការកសាងសន្តិភាព និង​ដើម្បីរក្សាជំនាញ​ និងបទពិសោធន៍ដែល CMAC ​បានរក្សាទុករហូតមកដល់បច្ចុប្បន្ន ដោយការ​សាងសង់ ​និងកែលម្អតួនាទីមុខងារដែលមានស្រាប់របស់វិទ្យាស្ថានបច្ចេកទេសសកម្មភាពកំចាត់មីន ស្ថិតនៅខេត្តកំពង់ឆ្នាំង ​និងសារមន្ទីរសន្តិភាពសកម្មភាពមីន​ ស្ថិន​នៅខេត្តសៀមរាប ដើម្បីរួម​ចំណែក​ដល់ការសម្រេចឱ្យបាននូវពិភពលោកដែលគ្មានគ្រាប់មីន ​និងសង្គមដែលមាននិរន្តរភាព ក៏ដូចជាការកាត់បន្ថយភាពក្រីក្រ។

ចាប់ពីថ្ងៃទី ១៦ ដល់ថ្ងៃទី១៩ ខែសីហា JICA ​បានចាត់​បញ្ជូន​ក្រុមស្រាវជ្រាវត្រៀម​សម្រាប់ការ​បកស្រាយ ​សេចក្តីព្រាងរបាយការណ៍ត្រៀមរៀបចំ​សម្រាប់គម្រោងសាងសង់ ហេដ្ឋា​រចនា​សម្ព័ន្ធ​រូបវ័ន្តអគារបណ្តុះបណ្តាល​ នៃវិទ្យាស្ថានបច្ចេកទេសសកម្មភាពមីន និងសារមន្ទីរសន្តិភាព​សកម្មភាព​មីន​របស់មជ្ឈមណ្ឌលសកម្មភាពកំចាត់មីនកម្ពុជា។

បន្ទាប់ពីចំណាយពេលធ្វើការជាមួយភាគីពាក់ព័ន្ធ ​ភាគីទាំងពីរបានឈានដល់កិច្ចព្រមព្រៀងមួយ​ចំពោះ​សេចក្តីព្រាងរបាយការណ៍ដោយក្រុមការងារ ​ហើយ JICA នឹងបញ្ចប់​របាយការណ៍រៀបចំ​ការ​ស្រាវជ្រាវដោយផ្អែកលើធាតុដែលបានព្រមព្រៀង។ ​យ៉ាងណាក៏​ដោយ​គម្រោងនេះ នឹងត្រូវចាប់​ផ្តើម​អនុវត្តនៅពេលខាងមុខ ​បន្ទាប់ពីយល់ព្រម​អនុញ្ញាត​ពីរាជរដ្ឋាភិបាលជប៉ុន៕ អត្ថបទ៖ ទូច