ភ្នំពេញ៖ អគ្គស្នងការរងនគរបាលជាតិ បានក្រើនរំលឹកដល់​កងកម្លាំង​នគរបាលការពារព្រំដែន​ទឹក​ទាំង​អស់ ត្រូវសហការជាមួយភាគីពាក់ព័ន្ធដទៃទៀត បន្តទប់ស្កាត់បទ​ល្មើសឆ្លងដែនខុសច្បាប់គ្រប់​ប្រភេទ និងត្រូវប្រកាន់ក្រមសីលធម៌វិជ្ជាជីវៈនគរបាល​បំរើដល់​ប្រជាជន​ និងភ្ញៀវទេសចរណ៍ជាតិ និងអន្តរជាតិតាមតំបន់ឆ្នេរកោះ​ ឲ្យបានល្អប្រសើរបន្ថែមទៀត។

ឧត្តមសេនីយ៍ឯក តេង សួន អគ្គស្នងការរងនគរបាលជាតិ ថ្លែងនៅក្នុងឱកាសរៀបចំពិធីប្រកាស កែ​សម្រួលភារកិច្ចតែងតាំង​មុខតំណែងនិងបំពាក់​ឋានន្តរសក្កិ​ជូនដល់ នាយ នាយរង និង​មន្ត្រី​នគរបាលជាតិ ​នៃនាយកដ្ឋាននគរបាលការពារព្រំដែនទឹក ​នាព្រឹកថ្ងៃទី១៩ ខែសីហា ឆ្នាំ២០២២នេះ ។

ឧត្តមសេនីយ៍ឯក តេង សួន ​បានលើកឡើងថា «ក្នុងនាមយើងជា​នគរបាលត្រូវអនុវត្តឱ្យ​បាន​ម៉ឺងម៉ាត់​ដាច់ខាត​នូវគោលការណ៍បទបញ្ជាណែនាំ របស់​រាជរដ្ឋាភិបាល ក្រសួងមហាផ្ទៃ និង​អគ្គស្នងការ​នគរបាលជាតិ ដែលបានប្រគល់ជូនត្រូវ​បង្កើន​ស្មារតី​ប្រុងប្រយ័ត្ន​យាមល្បាតតាមដាន​ ស្ដាប់សភាពការណ៍តាមតំបន់សមុទ្រតំបន់ឆ្នេរកោះ ជាប់ជាប្រចាំហើយសហការឱ្យ​បាន​ជិតស្និទ្ធ​ជាមួយនឹងកងយុទ្ធពលខេមរភូមិនជាមួយភាគីប្រទេសជិតខាងទប់ស្កាត់បទល្មើសឆ្លងដែនខុសច្បាប់គ្រប់ប្រភេទការពារ សុខសន្តិភាព សណ្តាប់ធ្នាប់សង្គមឈរលើគោលការណ៍រក្សាសន្តិសុខ​សន្តិភាព​មិត្តភាពកិច្ចសហប្រតិបត្តិការនិងកាអភិវឌ្ឍន៍ជាដើមនោះ»។

សូមបញ្ជាក់ថា ​នៅក្នុងពិធីខាងលើនេះដែរ ​ឧត្តមសេនីយ៍ឯក ទូច ពលៈ ប្រធាននាយកដ្ឋាន​នគរបាលការ​ពារព្រំដែនទឹក ​ក៏បានលើកឡើងអំពីសកម្មភាពការងាររបស់កងកម្លាំង​នគរបាល​ការពារព្រំដែនទឹកសម្រេចបានរយៈពេល ៩ខែឆ្នាំ២០២២​ ក្នុងការការពារសន្តិសុខសណ្ដាប់ធ្នាប់ជូន​ប្រជាពលរដ្ឋដែលរស់នៅប្រកបរបរតាមតំបន់ដែនសមុទ្ររវាងកម្ពុជា វៀតណាម និងប្រទេសថៃ បានពង្រឹងកិច្ចសហប្រតិបត្តិការផ្លាស់ប្ដូរបទពិសោធន៍ផ្ដល់ព័ត៌មានឲ្យគ្នា ទៅវិញទៅមក​ទាន់​ពេល​វេលា ​និងបាន​សហការ​បង្ក្រាបទប់ស្កាត់​ រាល់សកម្មភាពទាំងឡាយ​ដែល​បង្កផលប៉ះ​ពាល់ដល់​ស្ថេរភាពនយោបាយសន្តិសុខ សណ្ដាប់ធ្នាប់សង្គម និងបទល្មើសឆ្លងដែនខុសច្បាប់នានាផងដែរ៕ អត្ថបទ៖ បាន ចក់