កោះកុង៖ ក្រុមមន្រ្តីជំនាញ នៃមន្ទីរសាធារណការ និងដឹកជញ្ជូនខេត្តកោះកុង បាននឹងកំពុងផ្តើមស្ថាបនាស្ពានកោះយ៉ហើយ ស្ថិតនៅក្នុងភូមិសាស្រ្តស្រុកមណ្ឌលសីមា ក្រោមការចំណាយថវិកា១លាន៤សែនដុល្លាររបស់សម្តេចតេជោ ហ៊ុន សែន នាយករដ្ឋមន្រ្តី ។
គ្រឿងចក្រសម្ភារៈសំណង់ និងការចាក់ដីបំពេញការដ្ឋានសាងសង់ស្ពានកោះយ៉ ស្ថិតភូមិនាងកុក ឃុំប៉ាក់ខ្លង ស្រុកមណ្ឌលសីមា បានកំពុងផ្តើមជារូបរាងហើយប៉ុន្មានថ្ងៃនេះ សំដៅធ្វើយ៉ាងណាប្រែក្លាយស្ពានដែកបាឡេចាស់ទៅជាស្ពានបេតុងថ្មីមួយទៅថ្ងៃមុខ។
លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង បានឱ្យដឹងនៅថ្ងៃទី១៩ ខែសីហា ឆ្នាំ២០២២ថា គម្រោងស្ថាបនាស្ពានបេតុងថ្មីតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្រ្តី គឺមានប្រវែង ១២៦ ម៉ែត្រ និងទទឹង១១ម៉ែត្រ ដែលមានអ្នកឧកញ៉ា លី យ៉ុងផាត់ ទទួលបន្ទុកសម្របសម្រួល។
លោកប្រធានមន្ទីរសាធារណការ បន្ថែមទៀតថា ស្ពានបេតុងដ៏រឹងមាំថ្មីនេះ នឹងប្រសិទ្ធនាមជា ស្ពានសម្តេចតេជោ ហ៊ុន សែន កោះយ៉ ដែលគ្រោងចំណាយថវិកា១លាន៤សែនដុល្លាររបស់សម្តេចតេជោ ហ៊ុន សែន នាយករដ្ឋមន្រ្តី និងប្រើប្រាស់ពេលវេលា១ឆ្នាំកន្លះ ដើម្បីបញ្ចប់ការសាងសង់បម្រើដល់ប្រយោជន៍ប្រជាពលរដ្ឋ ក៏ដូចជាអ្នកទេសចរបានឆ្លងកាត់ទៅកម្សាន្តនៅរមណីយដ្ឋានឆ្នេរសមុទ្រប៉ាក់ខ្លង។ ចំពោះគម្រោងស្ថាបនាស្ពានកោះយ៉នេះដែរ មានផលប៉ះពាល់ចំពោះកើតមានតិចតួចបំផុត ទោះយ៉ាងណាក្រុមការងារពាក់ព័ន្ធបានសម្របសម្រួលដោះស្រាយរួចរាល់ហើយដែរ។ បើតាមការបញ្ជាក់របស់លោក ប្រាក់ វិចិត្រ អភិបាលស្រុកមណ្ឌលសីមា។
ទាំងអាជ្ញាធរ និងពលរដ្ឋ បង្ហាញក្តីរំពឹងថា នៅពេលការដ្ឋានស្ពាននេះបញ្ចប់ជាស្ថាពរ វាជាចំណងដៃថ្មីមួយសម្រាប់មូលដ្ឋានស្រុកមណ្ឌលសីមា ព្រមទាំងផ្តល់ការចរាចរណ៍ចរាចរណ៍ប្រកបដោយសុវត្ថិភាព និងទាក់ទាញកំណើនភ្ញៀវទេសចរមកលេងកម្សាន្តស្ទើរគ្រប់រដូវកាល៕អត្ថបទ៖ ឈឹម មករា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
