ភ្នំពេញ៖ នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព ថ្លែងថា នៅពេលនេះមជ្ឈមណ្ឌលបានត្រៀមកងកម្លាំង និងសំភារៈ ដែលមានខ្លួនមានរួចរាល់ និងបាន​បើក​ហ្វឹកហ្វឺន​ប្រើប្រាស់សំភារៈយោធាទាំងនោះ ​ដើម្បីត្រៀមចូលរួមជួយសង្គ្រោះគ្រោះមហន្តរាយគ្រោះ​ទឹកជំនន់នានា ​នៅថ្ងៃខាងមុខនេះ។

ថ្លែងប្រាប់BTV នៅថ្ងៃទី១៩ ខែសីហានេះ នាយឧត្តមសេនីយ៍ សែម សុវណ្ណនី ថ្លែងថា នៅពេលនេះ គ្រប់បណ្តាអង្គភាពនានាទាំងអស់ដែលចំណុះឲ្យមជ្ឈមណ្ឌលជាតិ ​គឺបានត្រៀមខ្លួនរួចរាល់ និងរង់ចាំ​បទបញ្ជាប្រមុខថ្នាក់ដឹកនាំរាជរដ្ឋាភិបាល ​និងប្រមុខថ្នាក់ដឹកនាំក្រសួងការពារជាតិ ដើម្បី​ចុះជួយពលរដ្ឋជួបគ្រោះមហន្តរាយការណ៍នានា​ ដែលកើតចេញគ្រោះទឹកជំនន់ និងគ្រប់គ្រោះធម្មជាតិនានា.។

ឯកឧត្តម ​បញ្ជាក់ថា ពាក់ព័ន្ធនឹងការហ្វឹកហ្វឺនសង្គ្រោះមហន្តរាយក្នុងអង្គភាពទ័ពមួកខៀវនេះ គឺ​ហ្វឹកហ្វឺន​ដើម្បីជួយសង្គ្រោះគ្រោះមហន្តរាយជូនប្រជាពលរដ្ឋ​នៅក្នុងប្រទេសផង និង​ហ្វឹកហ្វឺន​ដើម្បី​ត្រៀមប្រតិបត្តិការសង្គ្រោះគ្រោះមហន្តរាយនៅក្រៅប្រទេសផង។

សូមបញ្ជាក់ថា សម្រាប់ការហ្វឹកហ្វឺនសង្គ្រោះគ្រោះមហន្តរាយកងកម្លាំងមួកខៀវរបស់អង្គភាពសាលាហ្វឹកហ្វឺកឧត្តុង្គគឺបាន​ធ្វើឡើងនៅចំណុចក្រោមស្ពានព្រែកក្តាម​ ក្នុងភូមិព្រែកក្តាម​ ឃុំកោះចិន ស្រុកពញាឮ ខេត្តកណ្តាល។

នាយឧត្តមសេនីយ៍ សែម សុវណ្ណនី ថ្លែងថា ការហ្វឹកហាត់ជំនាញសង្គ្រោះនាពេលនេះធ្វើឡើងស្រប​ទៅ​នឹងកម្ពុជាត្រៀមលក្ខណៈក្នុង​ការ​បញ្ជូន​កងកម្លាំងចូលរួម​បេសកកម្មរបស់អង្គការ​សហប្រជាជាតិ​នាពេល​ខាងមុខនេះហើយ​ក៏ជាការបន្ថែមនូវជំនាញសង្គ្រោះថ្មីមួយទៀត​សម្រាប់​កងយោធាមួកខៀវ​ក្នុងការជួយសង្គ្រោះដល់មនុស្សជាតិទាំងក្នុងប្រទេសក៏ដូចជាក្នុងតំបន់បេសកកម្មរបស់អង្គការសហប្រជាជាតិ។

នាយឧត្តមសេនីយ៍ សែម សុវណ្ណនី ថ្លែងថា ​អាកាសធាតុមានភ្លៀងធ្លាក់ជាប់ជាប្រចាំផងនោះ​ស្ថានភាព​ទឹកជំនន់និងមានដោយយថាហេតុនៅ​តាមបណ្តាខេត្តមួយចំនួនជាបន្តបន្ទាប់ ដូចនេះ​កងកម្លាំងទាំងអស់ត្រូវត្រៀម​លក្ខណៈអោយបានគ្រប់គ្រាន់ដើម្បីចេញអន្តរាគមន៍ ២៤ម៉ោង​លើ២៤ម៉ោង តាម​បទបញ្ជារបស់រាជរដ្ឋាភិបាល ​និងការស្នើសុំពីអាជ្ញាធរមូលដ្ឋាន ដើម្បី​ចុះជួយសង្គ្រោះប្រជាពលរដ្ឋដែលរងគ្រោះដោយធម្មជាតិ​ដោយយថាហេតុផ្សេងៗ​ដែលកើត​មានឡើងក្នុងភូមិសាស្រ្តនានា៕ អត្ថបទ ស៊ុម សុខជា