ភ្នំពេញ៖ ក្រសួងអប់រំ យុវជន និងកីឡា ក្នុងពេលបច្ចុប្បន្ននេះ គឺកំពុងបញ្រ្ជាបចំណេះដឹងផ្នែក​ហិរញ្ញវត្ថុ​ទៅតាមសាលារៀន ​សម្រាប់សិស្សចាប់ពីកម្រិតសិក្សាថ្នាក់បឋមសិក្សា រហូតដល់ថ្នាក់​វិទ្យាល័យ។ ក្នុងដំណាក់កាលនេះ ​គឺអនុវត្តក្នុងខេត្តគោលដៅចំនួន ​៣គឺខេត្តកំពង់ចាម កំពត និងខេត្តសៀមរាប។

ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា លើកឡើងថា ខណៈនេះ ក្រសួងអប់រំ ​ដោយមានកិច្ចសហការជាមួយធនាគារជាតិនៃកម្ពុជា ​និងដៃគូសហការផ្សេងទៀត គឺ​កំពុងយកចិត្តទុកដាក់លើការបញ្ជ្រាបចំណេះដឹងហិរញ្ញវត្ថុជូនកុមារ និងយុវជន។

ការបញ្រ្ជាបនេះ គឺធ្វើឡើងដោយមានការបង្រៀនលើចំណេះដឹងហិរញ្ញវត្ថុទៅតាមសាលារៀន ដោយ​ដំណាក់កាលនេះ គឺអនុវត្តក្នុងខេត្តគោលដៅចំនួន ៣ គឺខេត្តកំពង់ចាម កំពត និងខេត្តសៀមរាប។

ការបង្រៀនចំណេះដឹងផ្នែកហិរញ្ញវត្ថនេះ ​គឺអនុវត្តគ្រប់កម្រិតសិក្សាចាប់ពីថ្នាក់បឋម រហូតដល់ថ្នាក់​វិទ្យាល័យផងដែរ ក្រោមការអនុវត្តសកម្មភាពសំខាន់ចំនួន ​៤ ក្នុងប្រព័ន្ធអប់រំនេះ។ ​គោលដៅសំខាន់ គឺដើម្បីជួយឱ្យកុមារយុវជន​ មានចំណេះដឹងផ្នែកហិរញ្ញវត្ថ ​មានការសម្រេចចិត្តត្រឹមត្រូវ លើការចំណាយ ការសំន្សំជាដើម។

ខណៈកំពុងយកចិត្តទុកដាក់លើការបង្រៀនសាកល្បង ​ចំពោះសាលារៀនក្នុងខេត្តគោលដៅទាំងបី ក្រសួងអប់រំ ធនាគារជាតិនៃកម្ពុជា​ និងដៃគូផ្សេងទៀត ក៏បានរៀបចំការចែកសៀវភៅ​ចំណេះដឹង​ហិរញ្ញវត្ថុ ដែលមានចំណងជើងថា “ តោះនិយាយពីលុយ” ជូនសាលាតាមគោលដៅផងដែរ។

ចំពោះការបង្រៀនចំណេះដឹងផ្នែកហិរញ្ញវត្ថុនេះ​ អ្នកនាំពាក្យក្រសួងអប់រំ ​ពុំបានបញ្ជាក់លម្អិតថា អនុវត្ត​នៅគ្រប់សាលារៀន ​ក្នុងខេត្តគោលដៅទាំង​ ៣រឺយ៉ាងណានោះទេ។ ​រីឯការពង្រីកវិសាលភាព បង្រៀនទៅរាជធានីខេត្ត រឺទូទាំងប្រទេស​ ក៏ឯកឧត្តមពុំទាន់បានបញ្ជាក់ផងដែរ៕អត្ថបទ៖គឹមហុក