ភ្នំពេញ៖ នាយឧត្តមសេនីយ៍ ប៊ុន លើត រដ្ឋលេខាធិការក្រសួងការពារជាតិ បានជំរុញដល់មន្ត្រីកងទ័ព ដែល​មាន​តួនាទីជាអ្នកផលិតប័ណ្ណចាក់វ៉ាក់សាំងជូនពលរដ្ឋ បានចាក់វ៉ាកសាំងរួចរាល់​ត្រូវធ្វើឲ្យមានប្រសិទ្ធ និង​ឆាប់​រហ័ស ដើម្បី​ឲ្យពលរដ្ឋ​យកទៅប្រើប្រាស់ក្នុងកាតព្វកិច្ច ដែល​ជាតម្រូវការផ្សេងៗ​។

ក្នុងពិធីសំណេះសំណាល​បំពាក់ឋានន្តរស័ក្តិ ជូនប័ណ្ណសរសើរ លិខិតសរសើរ នាយទាហាន នាយ​ទាហាន​រង ដែលមានស្នាដៃចេះយកទិន្នន័យ​បញ្ចូលទិន្នន័យ ផលិតប័ណ្ណវ៉ាក់សាំងកូវីដ១៩ នៅថ្ងៃទី១៩ ខែសីហា ឆ្នាំ២០២២ នាយឧត្តមសេនីយ៍ ប៊ុន លើត មានប្រសាសន៍ថា កម្ពុជាកំពុងទទួលនូវលទ្ធផលល្អ នៃ​ការ​ចាក់​វ៉ាក់សាំងជូនប្រជាពលរដ្ឋ ក៏ដូចជាការគ្រប់គ្រងបាននូវបញ្ហាជំងឺកូវីដ-១៩ ប៉ុន្តែ យើង​ក៏មិន​ត្រូវមាន​ការធ្វេសប្រហែស និងត្រូវបន្តអនុវត្តនូវវិធានការ ៣កុំ ៣ការពារ ឲ្យបានខ្ជាប់ខ្ជូនបន្តទៀត ។

ឯកឧត្តម បានបន្តថា មួយវិញទៀត បច្ចុប្បន្នការប្រើប្រាស់ប័ណ្ណចាក់វ៉ាក់សាំង ក៏មានតម្រូវការ​ច្រើន​ផង​ដែរ ពិសេសការធ្វើដំណើរទៅក្រៅប្រទេស ដែលសឹងតែមានតម្រូវការចាំ​បាច់ជាង​អត្តសញ្ញាណ​បណ្ណទៅ​ទៀត ព្រោះមុនទៅកាន់ប្រទេសផ្សេងៗ គេត្រូវត្រួតពិនិត្យមើលប័ណ្ណចាក់វ៉ាក់សាំងផងដែរ។

រដ្ឋលេខាធិការ​ក្រសួងពារជាតិរូបនេះ បានបន្ថែមថា ដូចនេះមន្ត្រីកងទ័ពដែលត្រូវផលិតប័ណ្ណចាក់វ៉ាក់សាំង ត្រូវ​ធ្វើឲ្យបានឆាប់រហ័ស មានប្រសិទ្ធភាពប្រើប្រាស់បានយូរ ដើម្បីកុំឲ្យខាត់ថវិកា ខាតបង់ពេលវេលា និង​កម្លាំង​កាយចិត្ត ក៏ដូចជាទំនុកចិត្តរបស់ថ្នាក់ដឹកនាំ។

ជាមួយនេះ នាយឧត្តមសេនីយ៍ ប៊ុន លើត ក៏បានថ្លែងអំណរគុណ ដល់សប្បុរសជននានា ដែលបានជួយ​ឧបត្ថម្ភ​គាំទ្រ និងផ្ដល់នូវសម្ភារបច្ចេកទេស ដល់ក្រសួងការពារជាតិ ដើម្បីយកទិន្នន័យ បញ្ចូលទិន្នន័យ ផលិតប័ណ្ណវ៉ាក់សាំងកូវីដ១៩ ជូនយោធិន អតីតយុទ្ធជន គ្រួសារ ប្រជាពលរដ្ឋ។

ឯកឧត្តម ក៏បានជំរុញទៅនាយទាហាន នាយទាហានរង ដែលត្រូវបានផ្ដល់ឋានន្តរស័ក្តិ ត្រូវបន្តខិតខំ​បំពេញ​តួ​នាទីការងារបម្រើផលប្រយោជន៍ប្រទេសជាតិ ការពារព្រះមហាក្សត្រ រដ្ឋធម្មនុញ្ញ រាជរដ្ឋាភិ​បាល​ស្រប​ច្បាប់ និងការពារប្រជាពលរដ្ឋឲ្យកាន់តែល្អប្រសើរ៕ អត្ថបទ៖ បាន សុខរិទ្ធិ