​អង់គ្លេស៖ អ្នកនាំពាក្យ​ក្រសួងការបរទេស​អង់គ្លេស​បាន​និយាយ​កាលពី​ថ្ងៃ​សុក្រ​ថា រុស្ស៊ី​ពុំមាន​សិទ្ធិ​ស្វ័យ​សម្រេច​ក្នុង​ការ​អង្គុយ​នៅ​កិច្ចប្រជុំ​ក្រុម​ប្រទេស​ G20 ​នោះ​ទេ ខណៈ​ប្រទេស​នេះ​កំពុង​បន្ត​ការ​វាយ​លុក​លើ​អ៊ុយ​ក្រែ​ន​។

​យើង​ស្វាគមន៍​កិច្ចខិតខំ​ប្រឹងប្រែង​រប​ស់​ឥណ្ឌូនេស៊ី​ក្នុងការ​ធានាបាន​ថា ​ផលប៉ះពាល់​នៃ​សង្គ្រាម​របស់​រុស្ស៊ី​ត្រូវ​បាន​ពិចារណា​នៅក្នុង​កិច្ចប្រជុំ G20 ព្រមទាំង​ការ​ចង្អុល​បង្ហាញ​ថា​ អ៊ុយ​ក្រែ​ន​អាច​ត្រូវ​បាន​តំណាង​ដោយ​ប្រធានាធិបតី​លោក​ Volodymyr Zelenskiy នៅក្នុង​កិច្ចប្រជុំ​កំពូល​មេដឹកនាំ​ក្រុម​ប្រទេស G20​។ ប្រទេស​ឥណ្ឌូនេស៊ី​នឹង​ធ្វើជា​ម្ចាស់ផ្ទះ​នៃ​កិច្ចប្រជុំ​កំពូល​នៅ​ក្នុង​ខែ​វិច្ឆិកា ដែល​ប្រធានាធិបតី​ប្រទេស​លោក Joko widodo បាន​និយាយ​ថា ​ប្រធានាធិបតី​រុស្ស៊ី​លោក Vladimir Putin និង​មេដឹកនាំ​ចិន​លោក Xi Jinping នឹងចូលរួម​។​

​ឥណ្ឌូណេស៊ីនឹង​ធ្វើជា​ប្រធាន​ក្រុម​ប្រទេស​មាន​សេដ្ឋកិច្ច​រីកលូតលាស់​ទាំង 20 ហើយ​បាន​ប្រឈម​សម្ពាធ​ពី​បណ្តា​ប្រទេស​លោកខាងលិច​ឱ្យ​ដក​ការអញ្ជើញ​លោក Putin ជុំវិញ​ការវាយលុក​របស់​ប្រទេស​លោក​លើ​អ៊ុយ​ក្រែ​ន ដែល​រដ្ឋាភិបាល​របស់​លោក Putin ​ចាត់ទុកថា​ជា​ប្រតិបត្តិការ​សឹក​ពិសេស៕

អត្ថបទ៖ ប៊ុនថន