ភ្នំពេញ៖ គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមពេលនេះ បានសាងសង់រួចរាល់ទីសុវត្ថិភាពជាច្រើន សម្រាប់ជម្លៀសប្រជាពលរដ្ឋក្នុងគ្រោះទឹកជំនន់។ ទីទួលសុវត្ថិភាពដែលសាងសាង់រួចរាល់នេះ គឺមានទាំងលក្ខណៈស្តង់ដារ និងមិនទាន់ស្តង់ដារ។

បច្ចុប្បន្នទឹកជំនន់គឺបានវាយប្រហារលើបណ្ដាខេត្តមួយចំនួន ក្នុងព្រះរាជាណាចក្រកម្ពុជា។ ទោះពុំទាន់មានការជន់លិចបំផ្លិចបំផ្លាញខ្លាំងក្លាយ៉ាងណាក្ដី គណៈកម្មាធិការជាតិគ្រប់គ្រង​គ្រោះ​មហន្តរាយ ក៏បានត្រៀមខ្លួនរួចរាល់ក្នុងការជួយសង្គ្រោះ ជម្លៀសប្រជាពលរដ្ឋផងដែរ។

ការត្រៀមជម្លៀសពលរដ្ឋទៅទីទួលសុវត្ថិភាព គឺគណៈកម្មាធិការជាតិគ្រប់គ្រងគ្រោះមហន្តរាយ សហការ​ជាមួយដៃគូ បានសាងសង់រួចរាល់ ទីទួលសុវត្ថិភាពចំនួន ៩ទីតាំង ក្នុងនោះគឺមាន ៥ទីតាំង​ក្នុងខេត្តកំពង់ធំ ២ទីតាំងក្នុងខេត្តកំពង់ឆ្នាំង និង២ទីតាំងក្នុងខេត្ត ពោធិ៍សាត់។ នេះជាការលើកឡើងរបស់ លោក សុទ្ធ គឹមកុលមុនី ទីប្រឹក្សាគណៈកម្មាធិការ​ជាតិគ្រប់គ្រង​គ្រង​គ្រោះមហន្តរាយ។

ទន្ទឹមនឹងមានការសាងសង់ទីទួលសុវត្ថិភាពមួយចំនួនរួចរាល់ ទីប្រឹក្សាគណៈកម្មាធិការជាតិ​គ្រប់គ្រង​គ្រោះមហន្តរាយ បាន​បន្តថា ចំនួននេះគឺមិនទាន់គ្រប់គ្រាន់នោះទេ។ ជាក់ស្ដែង​គណៈកម្មាធិការជាតិគ្រប់គ្រងគ្រងគ្រោះមហន្តរាយ ​ក៏មានផែនការសាងសង់បន្ថែម នៅតាម​ទីខេត្តដែលប្រឈមផងដែរ។ ក្នុងនោះមានដូចជាខេត្ត បន្ទាយមានជ័យ បាត់ដំបង ឧត្តរមានជ័យជាដើម។

គណៈកម្មាធិការជាតិគ្រប់គ្រងគ្រោះមហន្តរាយ ក៏បានត្រៀមកងកម្លាំងចំនួន ១៦កង ស្មើនឹង​ចំនួនជិត ២០០០នាក់ ដើម្បីចុះអន្តរាគមភ្លាមៗផងដែរ។ កងកម្លាំងចំនួន១៦កងនេះ គឺសុទ្ធតែទទួលបានការហ្វឹកហាត់និងបំពាក់សម្ភារគ្រប់គ្រាន់ក្នុងការសង្រ្គោះ។

បច្ចុប្បន្នទោះមានការជន់លិចតាមបណ្ដាខេត្តមួយចំនួនក្ដី ក៏ពុំទាន់មានការបញ្ជូនកងកម្លាំងពិសេស​របស់គណៈកម្មាធិការជាតិគ្រប់គ្រងគ្រងគ្រោះមហន្តរាយ​ ចុះទៅអន្តរាគមជួយនោះទេ ព្រោះកង​កម្លាំងតាមបណ្ដាខេត្តទាំងនោះ មានលទ្ធភាពគ្រប់គ្រាន់ក្នុងការដោះស្រាយ។

បញ្ហាអាកាសធាតុនៅកម្ពុជា គឺបន្តមានភ្លៀងធ្លាក់ជាប្រចាំ។ នេះបើយោងតាម ក្រសួងធនធានទឹក​និងឧតុនិយម។

ក្រសួងបញ្ជាក់ថា ចាប់ពីថ្ងៃទី ១៧ ដល់ថ្ងៃទី ២៣ ខែសីហា គឺមានភ្លៀងបន្តធ្លាក់ ដែលអាចបង្កឱ្យ​បណ្ដាខេត្តមួយចំនួនក្នុងតំបន់ខ្ពង់រាប មានជំនន់ទឹកភ្លៀង ដូចជាខេត្ត ព្រះវិហារ ស្ទឹងត្រែង រតនគិរី ក្រចេះ ត្បូងឃ្មុំ កំពង់ចាម ឧត្តរមានជ័យ។ ចំពោះតំបន់ទំនាបកណ្ដាល ដែលអាចមានការ​ប្រឈម​ជំនន់ទឹកភ្លៀង គឺខេត្តកំពង់ធំ៕ អត្ថបទ៖ គឹមហុក