ភ្នំពេញ៖ ក្រសួងសុខាភិបាលកម្ពុជា និងមន្ទីរពេទ្យព្រះអង្គឌួង សហការជាមួយទីភ្នាក់ងារ​សហប្រតិបត្តិការ​អន្តរជាតិកូរ៉េ (ហៅកាត់ កយកា-KOICA) ​និងមជ្ឈមណ្ឌលសាកលវិទ្យាល័យ វេជ្ជសាស្ត្រស៊ុនជុនយ៉ាង ​បានរៀបចំសិក្ខាសាលាលើកទី១ ​ស្តីពីការថែទាំរបស់គិលានុបដ្ឋាក, នាព្រឹកថ្ងៃទី២០ ខែសីហា ឆ្នាំ២០២២នេះ។

ឯកឧត្តមសាស្ត្រាចារ្យរង លូ លីឃាង នាយកមន្ទីរពេទ្យ ព្រះអង្គឌួង​ បានមានប្រសាសន៍ថា សិក្ខា​សាលានេះ​មាន​គោលបំណង​ គឺដើម្បីរិះរកមធ្យោបាយត្រួតពិនិត្យអំពីបែបបទរបស់​គិលានុបដ្ឋាក នៃមន្ទីរពេទ្យជាតិទាំង៥ និងពង្រឹងសមត្ថភាពរបស់ពួកគេបន្ទាប់ពីជំងឺកូវីដ១៩ ត្រូវបានគ្រប់គ្រង និង​ចែករំលែកចំណេះដឹងតាមរយៈការអញ្ជើញអ្នកឯកទេសគិលានុបដ្ឋាកមកពីមជ្ឈមណ្ឌល​សាកល​វិទ្យាល័យ​វេជ្ជសាស្ត្រស៊ុនជុនយ៉ាង នៃសាធារណរដ្ឋកូរ៉េ មកចែករំលែកចំណេះដឹង និងបទពិសោធន៍​របស់​ពួកគេជាមួយអ្នកចូលរួមទាំងអស់។

ជាមួយគ្នានោះដែរលោក នោ ហ្យន់ជូន ប្រធានតំណាងទីភ្នាក់ងារសហប្រតិបត្តិការ​អន្តរជាតិ​កូរ៉េ​(ហៅកាត់ កយកា-KOICA) ប្រចាំនៅកម្ពុជា បានថ្លែងថា គម្រោងអាទិភាព​របស់​កយកា គឺវិស័យ​សុខាភិបាល​ប្រទេសកម្ពុជាផ្នែកមួយ​ នៃកិច្ចខិតខំប្រឹងប្រែងក្នុងការលើកកម្ពស់គុណភាព​និង​លទ្ធភាព​ក្នុងការទទួលសេវាថែទាំសុខភាពសាធារណៈដោយការបានសាងសង់​នូវ​អគារចំនួន៣ នៅ​មន្ទីរពេទ្យចំនួនពីរ គឺអគារមិត្តភាពកម្ពុជា-កូរ៉េ​ នៅមន្ទីរពេទ្យកុមារជាតិ​ និងអគារចក្ខុរោគ និងអគារ​ជំងឺ​ត្រចៀក ច្រមុះ បំពង់ក នៅមន្ទីពេទ្យព្រះអង្គឌួង ​រួមទាំង៖ អគារមន្ទីរពេទ្យខេត្តចំនួន៣​ រួមមាន​អគារ​សម្ភពរោគស្ត្រី និងកុមារ នៅមន្ទីរពេទ្យខេត្តសៀមរាប, មន្ទីរពេទ្យបង្អែកបាធាយ​និងមន្ទីរពេទ្យ​មិត្តភាពកូរ៉េ-កម្ពុជា ក្នុងខេត្តកំពង់ឆ្នាំង ​និងការសាងសង់មណ្ឌលសុខភាព ​មាតាចំនួន៥ នៅ​ខេត្តមណ្ឌលគិរី និងរតនគិរី។

ថ្លែងក្នុងឱកាសនោះឯកឧត្តម សាស្រ្តាចារ្យ ម៉មប៊ុនហេង រដ្ឋមន្ត្រីក្រសួងសុខាភិបាល បានថ្លែង​អំណរ​គុណ​យ៉ាងជ្រាលជ្រៅចំពោះកយកានឹងរដ្ឋាភិបាល​ និងប្រជាជននៃសាធារណរដ្ឋកូរ៉េ ដែល​បានគាំទ្រផ្នែកបច្ចេកទេសសម្ភារៈ​ និងហិរញ្ញវត្ថុសម្រាប់វិស័យសុខាភិបាលកម្ពុជា។

សូមបញ្ជាក់ផងដែរថា រដ្ឋាភិបាលនៃសាធារណរដ្ឋកូរ៉េតាមរយៈទីភ្នាក់ងារ​សហប្រតិបត្តិការ​អន្តរជាតិ​កូរ៉េ​ បានផ្ដល់ជំនួយឥតសំណងក្នុងទឹកប្រាក់ចំនួន ៨​ លានដុល្លារសហរដ្ឋអាមេរិក​សម្រាប់គម្រោង​ការកសាង ​កសាងសមត្ថភាពមជ្ឈមណ្ឌលត្រចៀក ច្រមុះបំពង់ក ​នៅមន្ទីរពេទ្យព្រះអង្គឌួង ដែលបានអនុវត្តចាប់ពីឆ្នាំ២០១៨ រហូតដល់ឆ្នាំ២០២២នេះ។ អគារត្រចៀក ច្រមុះ បំពង់ក ចំនួន ១ខ្នង ដែលមានកម្ពស់ ៥ជាន់ បានសាងសង់រួចរាល់ហើយនៅក្នុងបរិវេណមន្ទីរពេទ្យព្រះអង្គឌួង ហើយអគារនេះ បានបំពាក់នូវសម្ភារៈទំនើបបំផុត ចាំបាច់នានា ​ដើម្បីពិនិត្យព្យាបាល និងវះកាត់​ធ្វើយ៉ាង​ណា​ដើម្បីបង្កើនគុណភាពសេវាកម្ម ​ក្នុងមន្ទីរពេទ្យឲ្យល្អប្រសើរមួយកម្រិតថែមទៀត។ ក្រៅពីការលើកកម្ពស់ផ្នែកហេដ្ឋារចនាសម្ព័ន្ធរូបវន្តសមត្ថភាពរបស់វេជ្ជបណ្ឌិតជំនាញ​ឯកទេស​និងបុគ្គលិកទាំងអស់នឹងត្រូវបានបង្កើនសមត្ថភាពតាមរយៈកម្មវិធីបណ្ដុះបណ្ដាល និងការ​ផ្ទេរចំណេះដឹង​ និងចំណេះធ្វើពីវេជ្ជបណ្ឌិតជនជាតិកូរ៉េផងដែរ៕អត្ថបទ រដ្ឋា