ភ្នំពេញ៖ ដើម្បីកាត់បន្ថយផលប៉ះពាល់សង្គមដោយសារគ្រឿងញៀន អាជ្ញាធរជាតិប្រយុទ្ធប្រឆាំងគ្រឿង បានជំរុញដល់អាណាព្យាបាល និងអ្នកជក់គ្រឿងញៀនផ្ទាល់ សូមរួសរាន់ទៅរកសេវាព្យាបាលនៅមន្ទីរពេទ្យរដ្ឋជាង ៤០០កន្លែង និងមណ្ឌលព្យាបាលបណ្តុះអាសន្នទាំងរយៈពេលវែង និងខ្លី ១៩កន្លែង នៅទូទាំងប្រទេសកម្ពុជា។
មានប្រសាសន៍ក្នុងកិច្ចសំភាសន៍ជាមួយBTV ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ អាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា បច្ចុប្បន្នបញ្ហាគ្រឿងញៀនសំយោគកំពុងកើនឡើងក្នុងពិភពលោក រាប់បញ្ចូលទាំងកម្ពុជាផងដែរ។
ការកើនឡើងនេះ ដោយសារក្រុមឧក្រិដ្ឋជនជួញដូរគ្រឿញៀនដែលមានក្រុមអង្គការចាត់តាំង លបលួចកែច្នៃសារធាតុគីមី និងដឹកជញ្ជូនសារធាតុញៀនតាមផ្លូវសមុទ្រ ស្របពេលមានវិបត្តិជំងឺកូវីដ-១៩ បញ្ហាជម្លោះប្រដាប់អាវុធនៅបរទេស និងកត្តាគួបផ្សំផ្សេងៗមួយចំនួនទៀត។
ឯកឧត្តម បន្តថា ដើម្បីទប់ស្កាត់បញ្ហាគ្រឿងញៀនមិនឲ្យទុំជោដូចបណ្តាលប្រទេសមួយចំនួន អាជ្ញាធរជាតិប្រយុទ្ធប្រឆាំងគ្រឿង ប្តេជ្ញាបន្តអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៧ ក្នុងឆ្នាំ២០២២ ឲ្យបានហ្មត់ចត់ជាទីបំផុត និងសូមអំពាវនាវដល់ដល់អាណាព្យាបាល និងអ្នកជក់គ្រឿងញៀនផ្ទាល់ សូមរួសរាន់ទៅរកសេវាព្យាបាលនៅមន្ទីរពេទ្យ និងទីតាំងផ្សេងៗមួយចំនួនទៀត។
ក្នុងឆ្នាំ២០២១កន្លងទៅ សមត្ថកិច្ចកម្ពុជាបង្ក្រាបបទល្មើសគ្រឿងញៀនបានសរុបចំនួន ៦,៣០៨ករណី ថយចុះ៤,១៥៣ករណី ស្មើនឹង ៣៩,៧០ភាគរយធៀបនឹងឆ្នាំ២០២០។ ក្នុងចំណោមករណីបង្ក្រាបបាន គឺឃាត់ខ្លួនជនសង្ស័យសរុបជាង ១ម៉ឺននាក់ ក្នុងនោះមានជនបរទេសចំនួន ៣៦៥នាក់។ ចាប់យកគ្រឿងញៀនសរុបជាង ៤តោន៦៨៩គីឡូក្រាម សារធាតុគីមីផ្សំបង្ក្រាបបានជាង ៨៤តោន និងសារធាតុញៀនផ្សេងៗមួយចំនួនទៀតផងដែរ៕
អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
