អាហ្វហ្គានីស្ថាន៖ ក្រុមមន្ត្រីបាននិយាយកាលពីថ្ងៃសៅរ៍ថា ភ្លៀងធ្លាក់ខ្លាំងបង្កឲ្យមានទឹកជំនន់ដ៏គំហុកនៅក្នុងខេត្ត Logar ភាគខាងកើតរបស់ប្រទេសអាហ្វហ្គានីស្ថាន ដោយបានសម្លាប់មនុស្សយ៉ាងហោចណាស់ ២០នាក់ និងបំផ្លិចបំផ្លាញលំនៅឋានជាង ៣ពាន់ខ្នង។
ការិយាល័យខេត្តនេះបាននិយាយថា ភ្លៀងបានវាយប្រហារលើតំបន់មួយចំនួនរបស់ខេត្តនេះកាលពីថ្ងៃសៅរ៍ ដោយបង្កឲ្យមនុស្សជាង ៣០នាក់រងរបួសបន្ថែមពីលើអ្នកស្លាប់ទាំងនោះ។ សេចក្ដីថ្លែងការណ៍និយាយថា ទឹកជំនន់នេះក៏បានបំផ្លិចបំផ្លាញប្រឡាយទឹក និងដីកសិកម្មប្រមាណជាង ២ពាន់ហិចតាផងដែរភាគច្រើនដីចម្ការ ព្រមទាំងបសុសត្វប្រមាណ ២ពាន់ក្បាលបានងាប់។ ប្រជាជនអាហ្វហ្គានីស្ថានជាច្រើនបានស្លាប់រៀងរាល់ឆ្នាំដោយសារទឹកជំនន់ និងព្យុះភ្លៀងពិសេសនៅក្នុងតំបន់ជនបទក្រីក្រ ជាទីដែលលំនៅឋានសាងសង់គ្មានគុណភាពតែងប្រឈមនឹងការបាក់រលំ។
ចំណែកនៅក្នុងប្រទេសជិតខាងអាហ្វហ្គានីស្ថាន គឺប្រទេសប៉ាគីស្ថានក៏ជួបគ្រោះទឹកជំនន់ដូចគ្នាដែរ។ ប្រជាជននៅភាគខាងត្បូងបានជម្លៀសចេញពីលំនៅឋានរបស់ពួកគេ ខណៈភ្លៀងធ្លាក់ខ្លាំងបណ្ដាលឲ្យមានទឹកជំនន់ហក់ឡើងដល់កម្រិតខ្ពស់បំផុតមិនធ្លាប់មាន។ ក្រុមសង្គ្រោះបានជួយក្រុមអ្នកភូមិដែលបានជាប់ក្នុងទឹកជំនន់ ចេញពីលំនៅឋានរបស់ពួកគេ និងដំឡើងជំរំតង់សម្រាប់ការស្នាក់នៅបណ្ដោះអាសន្ន។ ជារៀងរាល់ឆ្នាំភាគច្រើននៃប្រទេសប៉ាគីស្ថានតែងរងគ្រោះពីភ្លៀងមូសុងប្រចាំឆ្នាំ ដែលនាំឲ្យមានការរិះគន់អំពីផែនការទន់ខ្សោយរបស់រដ្ឋាភិបាល ក្នុងការដោះស្រាយបញ្ហាគ្រោះធម្មជាតិនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
