ភ្នំពេញ៖ បណ្ដាខេត្តមួយចំនួននៅតាមព្រំដែនជាប់ជាមួយប្រទេសថៃ ចាប់ផ្ដើមរងការជន់លិច ក្រោយមាន​ភ្លៀងធ្លាក់ជាប់គ្នាច្រើនថ្ងៃជាបន្តបន្ទាប់ ដែលបង្កឱ្យមានការបាក់ទំនប់ និងមានការ​ជម្លៀស​ប្រជាពលរដ្ឋមួយចំនួនទៅទីទួលសុវត្ថិភាព ​និងក៏បានឆក់យកជីវិតពលរដ្ឋមួយរូប ក្នុងស្រុកសំឡូត ខេត្តបាត់ដំបងផងដែរ។ នេះជាការបញ្ជាក់របស់អ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយ។

បញ្ហាទឹកជំនន់នៅតាមបណ្ដាខេត្តនៅជាប់ព្រំដែន​ប្រទេសថៃ​ បាន​ឆក់យកអាយុជីវិតប្រជាពលរដ្ឋ​ម្នាក់ រស់នៅក្នុងស្រុកសំឡូត ​ខេត្តបាត់ដំបង។ ហេតុការណ៍នេះ ​គឺកើតដោយការក្រឡាប់ទូក ពេលឆ្លងកាត់ទឹកស្ទឹង តាតោក ដែលកំពុងមានការហូរខ្លាំង។ គ្រោះថ្នាក់នេះ គឺមានជនរង​គ្រោះ១នាក់​ បានរួចផុតជីវិត ​រីឯជនរងគ្រោះមួយរូបទៀត ​ត្រូវបានរកឃើញសាកសព ក្រោយមាន​ការ​ចុះអន្តរាគមន៍ស្វែងរក។នេះជាការលើកឡើងរបស់ លោក សុទ្ធ គឹមកុលមុនី ជាអ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយ ​នៅព្រឹកថ្ងៃទី ២២ ខែសីហា នេះ។

បញ្ហាទឹកជំនន់នេះ សម្រាប់ខេត្តព្រះវិហារ និងខេត្តឧត្តរមានជ័យ កំពុងរងការជន់លិចក្រោយមាន​ភ្លៀងធ្លាក់​ជាបន្តបន្ទាប់ផងដែរ។

លោកបញ្ជាក់ថា សម្រាប់ខេត្តព្រះវិហារ ក្នុងឃុំស្រអែម ស្រុកជាំក្សាន្តបញ្ហាទឹកបានបង្កឱ្យមានការ​បាក់ទំនប់ ​អន្លង់ក្រពើ ​​មានការជន់លិចផ្លូវ មួយចំនួន។ ចំពោះស្រុកត្រពាំងប្រាសាទ ស្ថិតក្នុងខេត្តឧត្តរមានជ័យវិញ ក៏មានការជន់លិចដែរ។ ​ការជន់លិចនេះ ​ក៏បង្កឱ្យមានការ​ជម្លៀស​ប្រជាពលរដ្ឋទៅកាន់ទីទួលសុវត្ថិភាព​មួយចំនួនផងដែរ។ ​លោក បញ្ជាក់ថា ​ជំនន់ទឹកភ្លៀងនេះ ពុំទាន់ឈានដល់ដំណាក់កាលធ្ងន់ធ្ងរនោះទេ។

ការជន់លិចនេះ គណៈកម្មាធិការជាតិគ្រប់គ្រងគ្រោះមហន្តរាយ ​ក៏បានដាក់កងកម្លាំងរបស់ខ្លួន ចុះទៅ​ជួយអន្តរាគមជួយសង្រ្គោះជម្លៀសប្រជាពលរដ្ឋ​ ក្នុងតំបន់រងការជន់លិចផងដែរ។

ចំពោះទីតាំង​ខេត្តបន្ទាយមានជ័យ ​ខណៈនេះក៏កំពុងត្រៀមប្រចាំការជួយ ២៤ម៉ោងផងដែរ។ ការត្រៀមនេះ ​គឺដោយសារខាងប្រទេសថៃ ​កំពុងរងការជន់លិចខ្លាំង​។ ​នេះជាការបញ្ជាក់ថែមរបស់ អ្នកនាំពាក្យ ​គណៈកម្មាធិការជាតិគ្រប់គ្រងគ្រោះមហន្តរាយ។

បញ្ហាទឹកជំនន់នេះ ក្រសួងធនធានទឹក និងឧតុនិយមក៏បានចេញសេចក្ដីជូនដំណឹងបញ្ជាក់ដែរថា ចាប់ពីថ្ងៃទី ២០ ដល់ថ្ងៃទី ២៣ ខែសីហា ​ខេត្តមួយចំនួនអាចប្រឈមជំនន់ទឹកភ្លៀង។ ខេត្តទាំងនោះមានដូចជា​ ខេត្តឧត្តរមានជ័យ ព្រះវិហារ កំពង់ធំ ស្ទឹងត្រែង រតនគិរី ៕ អត្ថបទ៖ គឹមហុក