ភ្នំពេញ ៖ មន្ទីរពេទ្យព្រះអង្គឌួង សហការជាមួយអង្គការកយកា នៅព្រឹកថ្ងៃទី២២ ខែសីហា ឆ្នាំ២០២២នេះ បានបើកយុទ្ធនាការលាងសំអាតដៃ គឺសង្រ្គោះជីវិតជូនដល់បងប្អូនប្រជាពលរដ្ឋ ក្មេង ចាស់ ប្រុស ស្រី ដែលមកទទួលសេវាពិគ្រោះ ជំងឺ នៅមន្ទីរពេទ្យ ដើម្បីឱ្យពួកគាត់បានយល់ដឹងពីរបៀបលាងដៃឱ្យបានត្រឹមត្រូវកាត់បន្ថយការចម្លងជំងឺឆ្លងផ្សេងៗពិសេសជំងឺកូវីដ-១៩។

លោកសាស្ត្រាចារ្យ រង លូ លីឃាង នាយកមន្ទីរពេទ្យព្រះអង្គឌួង បានមានប្រសាសន៍ថា នេះគឺជាលើកដំបូងហើយដែលមន្ទីរពេទ្យព្រះអង្គឌួង បានបើកយុទ្ធនាការនេះឡើង ដើម្បីបង្ហាញពីរបៀបលាងដៃឱ្យបានត្រឹមត្រូវតាមក្បួនខ្នាតដល់គ្រូពេទ្យ និងប្រជាពលរដ្ឋដែលអញ្ជើញមកទទួលសេវានៅមន្ទីរពេទ្យសំដៅការការពារការចម្លងរោគ និងការឆ្លងរោគផ្សេងៗ។ យុទ្ធនាការនេះ បានផ្សាភ្ជាប់ទៅ នឹងសិក្ខាសាលាដល់គិលានុប្បដ្ឋាក ដែលអង្គការកយកា បានរៀបចំកាលពីថ្ងៃទី២០ ខែសីហា ឆ្នាំ២០២២កន្លងទៅ ហើយដោយនៅក្នុងសិក្ខាសាលានោះក៏មានប្រធានបទពីការលាងដៃនេះដែរ។ ការបង្ហាត់បង្រៀនដល់ប្រជាពលរដ្ឋដែលមកទទួលសេវានៅមន្ទីរពេទ្យព្រះអង្គឌួង បានយល់ដឹងពីរបៀបលាងដៃឱ្យបានត្រឹមត្រូវនេះ គឺដើម្បីឱ្យពួកគាត់ជួយផ្សព្វផ្សាយ និងបង្រៀនបន្តដល់សាច់ញាតិក្រុមគ្រួសារ និងប្រជាពលរដ្ឋនៅក្នុងសហគមន៍ជាបន្តទៀតដើម្បីការពារពីជំងឺឆ្លងផ្សេងៗពិសេសជំងឺកូវីដ-១៩។

លោកសាស្ត្រាចារ្យ រង លូ លីឃាង បានបញ្ជាក់ថា ការធ្វើអនាម័យដូចជា រស់នៅស្អាត និងផឹកស្អាតពិតជាមានសារសំខាន់ណាស់សម្រាប់ប្រជាពលរដ្ឋក្នុងការបញ្ជៀស ការចម្លងជំងឺឆ្លង ផ្សេងៗ ពិសេសជំងឺឆ្លង

ថ្មីៗដែលកំពុងកើតមាននៅលើពិភពលោកយើងនេះ ដូចជា៖ ជំងឺកូវីដ-១៩ និងជំងឺឆ្លងផ្សេងៗទៀត។

យើងដឹងហើយថា គ្រូពេទ្យយើងទាំងអស់គ្នា ក៏ដូចជាបុគ្គលិកមន្ត្រីរាជការបានដឹងពីរបៀបលាងសំអាតដៃដើម្បីការពារជំងឺឆ្លងផ្សេងៗ ដែលឆ្លងតាមរយៈការប៉ះពាល់ដៃនេះ។ ប៉ុន្តែយ៉ាងណាក៏ដោយទន្ទឹមនឹងមានក្រមសីលធម៌ និងមានវិន័យច្បាស់លាស់ ក៏យើងត្រូវលាងសំអាតខ្លួនប្រាណយើងឱ្យបានស្អាតដែរ ហើយគ្រូពេទ្យបានដឹងពីរៀបលាងហើយ តែនេះជាការរំលឹកហើយរំលឹកទៀត ដើម្បីឱ្យពួកគាត់អនុវត្តឱ្យបានខ្ជាប់ខ្ជួននិងរៀនហើយរៀនទៀតនិងអនុវត្តឥតឈប់ឈរ។ ក្រៅពីយុទ្ធនាការលាងសំអាតដៃនេះ មន្ទីរពេទ្យនឹងធ្វើយុទ្ធនាការផ្សេងៗទៀតដូចជាការលាងដៃនៅក្នុងបន្ទប់វះកាត់ឱ្យបានត្រឹមត្រូវ ពិសេសលាងនៅតាមបន្ទប់វះកាត់ ដែលមានរបៀបលាងផ្សេងទៀត ដើម្បីការពារការចម្លងរោគ។

លោកស្រី គីម ជីនហា (Kim Jin hua) ប្រធានផ្នែកគ្រប់គ្រងបង្ការរោគនៃមន្ទីរពេទ្យ ស៊ុង ចុងយ៉ាង នៃ សាធារណរដ្ឋ កូរ៉េ បានមានប្រសាសន៍ថា ការចូលរួមជួយគាំទ្រដល់យុទ្ធនាការអនាម័យដៃជាមួយពេទ្យព្រះអង្គឌួងនេះ ដោយសារការធ្វើអនាម័យដៃនេះវាជាចំណុចសំខាន់ណាស់ ក្នុងការ លើកកម្ពស់សុខភាពរបស់ប្រជាពលរដ្ឋកម្ពុជា ពិសេសប្រជាពលរដ្ឋដែលមកទទួលសេវានៅមន្ទីរពេទ្យព្រះអង្គឌួង។ ម្យ៉ាងទៀតអង្គការ កយកា តែងតែសហការនិងជួយដល់មន្ទីរពេទ្យអង្គឌួងជារៀងរហូតមក ដែលធ្វើឱ្យមន្ទីរពេទ្យនេះមានការរីកចំរើន និងមានពលរដ្ឋមកទទួលសេវាកាន់តែច្រើនឡើងៗជាលំដាប់។

លោក ហុងបញ្ញា ប្រធានក្រុមការងារអប់រំការទប់ស្កាត់បង្ការចម្លងរោគ នៃមន្ទីរពេទ្យព្រះអង្គឌួង បានលើកឡើងថា ដើម្បីកាត់បន្ថយនៃការឆ្លងជំងឺផ្សេងៗយើងត្រូវលាងដៃឱ្យបានត្រឹមត្រូវដែលមានចំនួន៦ដំណាក់កាល ដើម្បីលុបបំបាត់មេរោគដែលទំនៅលើដៃរបស់យើងម្នាក់ៗ ពោលគឺយើងត្រូវលាងដៃនៅពេលមុនឬក្រោយពេលបរិភោគអាហារ ឬមុន និងក្រោយចូលបន្ទប់ទឹក៕ អត្ថបទ ៖ រដ្ឋា