ស្ទឹងត្រែង ៖ មន្ត្រីជំនាញ កាលពីចុងសប្ដាហ៍មុននេះ បានឆ្មក់បង្ក្រាបអាជីវកម្មសាច់សត្វព្រៃនៅក្នុងផ្សារសាមគ្គីស្ទឹងត្រែង ដែលត្រូវបានគេដឹងថាកើតមានរាប់ឆ្នាំមកហើយ ។

លោក នួន ពិសី អនុប្រធានការិយាល័យដែនជម្រកសត្វព្រៃ បានឱ្យដឹងថា នេះជាលើកទី៤ហើយ ដែលកម្លាំងរបស់មន្ទីរបរិស្ថាន ​និងមានការសម្របសម្រួលនីតិវិធីច្បាប់ដោយលោក ជា សុភ័ក្រ្ដ ព្រះរាជអាជ្ញារងអមសាលាដំបូងខេត្តស្ទឹងត្រែង ​បានឆ្មក់បង្ក្រាប និងដកហូតយកសាច់ព្រៃពីការ​ធ្វើ​អាជីវកម្ម បើ ទោះជាការឆ្មក់បង្ក្រាបរាល់លើកមិនដែលចាប់បានអ្នកលក់ក៏ដោយ។

លោក បានឱ្យដឹងថា ​ការឆ្មក់បង្ក្រាបលើកនេះ​ ក៏មិនអាចចាប់អ្នកលក់បានដែរ តែដកហូត​បាន​សត្វត្រកួតរស់ចំនួន០៣ក្បាល និងសាច់សត្វព្រៃមួយចំនួនតែប៉ុណ្នោះ។

ប្រជាពលរដ្ឋ ​បានគាំទ្រសកម្មភាពបង្ក្រាបបទល្មើសអាជីវកម្មសត្វព្រៃនេះ ទោះបីជាឃាត់ខ្លួន​អ្នក​លក់​មិនបានមែន​ តែក៏បានបង្ហាញពីការយកចិត្តទុកដាក់របស់មន្ត្រីជំនាញ ​និងបានធ្វើឱ្យឈ្មួញ​មានការកោតញញើតខ្លះដែរ ។

ប្រជាពលរដ្ឋ ​ស្នើសុំឱ្យមានការបង្ក្រាបបែបបនេះរាល់មួយសប្តាហ៍ម្តង​ ទើបមានប្រសិទ្ធភាព តែបើ​ការ​ចុះបង្ក្រាបរបស់សមត្ថកិច្ច ​ទាល់តែមានសេចក្តីរាយការណ៍​ពីប្រជាពលរដ្ឋនោះ មិនទទួល​បាន​លទ្ធផលល្អទេ។

នៅក្នុងត្រីមាសទី៣ ឆ្នាំ២០២២នេះ សមត្ថកិច្ច ​បានបង្ក្រាបបទល្មើសលក់សត្វព្រៃ ចំនួន៣លើក​មកហើយ ​និងប្រមូលយកវត្ថុតាងសាច់សត្វជ្រូកព្រៃ​ ត្រកួត ឈ្លូស ប្រើស កាំប្រម៉ា ​ជាដើម យកទៅដុតចោលភ្លាមៗ ​ចំណែកសត្វនៅរស់ ត្រូវបានយកទៅលែងចូលព្រៃវិញ៕

អត្ថបទ៖ មាស ផល្លា