ភ្នំពេញ៖ រដ្ឋមន្ដ្រីក្រសួងទេសចរណ៍ រំពឹងថា នៅក្រោយឆ្នាំ២០៣៥ ខាងមុខនេះ ចំនួនអ្នកទេសចរ​អន្ដរជាតិ​នឹងចូលសស្សនាប្រទេសកម្ពុជា​ កើនឡើង៧លាននាក់ បង្កើតចំណូលចូលសកម្មភាព​សេដ្ឋកិច្ច ៥ពាន់លានដុល្លារ ។

ឯកឧត្ដម ថោង ខុន រដ្ឋមន្ដ្រីក្រសួងទេសចរណ៍ មានប្រសាសន៍ក្នុងពិធីបើកវគ្គបណ្ដុះបណ្ដាល​ពង្រឹង​ជំនាញវិស័យទេសចរណ៍ នៅខេត្ដសៀមរាប កាលពីចុងសប្ដាហ៍នេះថា ក្រុងសៀមរាប ជាទីក្រុង​បេតិកភណ្ឌ​ និងជាគោលដៅទេសចរណ៍ប្រកបដោយគុណភាព ដែលត្រូវរក្សាការពារ​ឱ្យបានហ្មត់ចង់ ​ដើម្បីទទួលទេសចរដែលអាចប៉ាន់ប្រមាណថា ​នៅក្រោយឆ្នាំ២០៣៥ខាងមុខ មានអ្នកទេសចរចូលមកទស្សនាទីក្រុងបេតិកភណ្ឌ ​មានចំនួន៧លាននាក់។

ឯកឧត្ដម បានស្នើឱ្យរៀបចំកន្លែងទេសចរណ៍ឱ្យបានស្រស់ស្អាត និងត្រូវមានការរៀបចំ​ទីក្រុង​សៀមរាបថ្មី ក្រៅពីទីក្រុងបេតិភណ្ឌ ដូចជានៅជិតព្រលានយន្ដហោះថ្មី និងត្រូវរៀបចំ​គោលដៅអភិវឌ្ឍន៍​ទេសចរកន្លែងផ្សេងទៀតឱ្យបានច្បាស់ ដូចបឹងទន្លេសាប ចុងឃ្នៀស ជាដើម។

បើតាមឯកឧត្ដម ថោង ​ខុន ក្រោយពីប្រទេសកម្ពុជា ​បានបើកដំណើរការវិស័យទេសចរណ៍លើក ឡើងវិញ ប្រទេសកម្ពុជា​បានទទួលអ្នកទេសចរអន្ដរជាតិ ​មានចំនួនជាង ​៧៤ ម៉ឺននាក់ ក្នុងរយៈពេល​៧ខែឆ្នំា២០២២នេះ​ ក្នុងកំណើន៥៦៥ភាគរយ ​បើធៀបនឹងឆ្នាំ២០២១កន្លមក ខណៈដែលនៅ​ខេត្ដ​សៀមរាប ទទួលបានទេសចរផ្ទៃក្នុងប្រមាណមួយលានពីរសែននាក់ក្នុងរយៈពេល៧ខែ កើនឡើងជាង ៨០០ភាគរយ បើធៀបរយៈពេលដូចគ្នា៕ អត្ថបទ៖ ឈិត សាវី