ភ្នំពេញ៖ វៀតណាម បានសរសើរដល់កម្ពុជា ជាពិសេសក្រោមការដឹកនាំរបស់សម្តេចតេជោ ហ៊ុន សែន នាយក​រដ្ឋមន្ត្រី បានទទួលនូវជោគជ័យជាច្រើន ជាពិសេសលើការអភិវឌ្ឍសេដ្ឋកិច្ចសង្គម និងតួនាទី​របស់​កម្ពុជានៅលើឆាកអន្តរជាតិ។

ខណៈត្រូវបានសម្តេចតេជោ ហ៊ុន សែន នាយករដ្ឋមន្រ្តីកម្ពុជា អនុញ្ញាតឱ្យចូលជួបសំដែងការគួរសម និង​ពិភាក្សា​ការងារ នាព្រឹកថ្ងៃទី២២ ខែសីហា នេះ ឯកឧត្តម ឡេ ហាយជុង សមាជិកមជ្ឈិមបក្ស និង​ជា​ប្រធា​ន​គណៈទាក់ទងការបរទេសមជ្ឈិមបក្សកុម្មុយនីស្តវៀតណាម បាន​វាយតម្លៃខ្ពស់ ចំពោះជោគជ័យ​ជា​ច្រើន ដែលកម្ពុជាសម្រេចបាន ជាពិសេសលើការអភិវឌ្ឍសេដ្ឋកិច្ច សង្គម តួនាទី​របស់​កម្ពុជា​លើឆាក​អន្តរ​ជាតិ។ នេះបើតាមការឱ្យដឹងរបស់ឯកឧត្ដម អ៊ាង សុផល្លែត ជំនួយ​ការ​ផ្ទាល់​សម្ដេច​តេជោ។

ឯកឧត្តម ឡេ ហាយជុង បានបញ្ជាក់អំពីគោលបំណង នៃដំណើរទស្សនកិច្ចមកកម្ពុជានាពេលនេះ ដើម្បី​ជួយ​ដល់ទំនាក់ទំនងសាមគ្គីភាព រវាងបក្ស និងបក្សរដ្ឋ និងរដ្ឋប្រជាជន និងប្រជាជន ធ្វើឱ្យទំនាក់ទំនង រវាង​ប្រទេសទាំងពីរកាន់តែរឹងមាំ និងមានប្រសិទ្ធភាព។

ជាការឆ្លើយតប សម្ដេចតេជោ បានថ្លែងអំណរគុណជូនចំពោះឯកឧត្តម ឡេ ហាយជុង ចំពោះការគាំទ្រ​កម្ពុជា ដែលកំពុងតែធ្វើជាប្រធានអាស៊ាន និងសេចក្តីសម្រេចរបស់សន្និបាតគណៈកម្មាធិការកណ្ដាល​គណបក្ស​ប្រជាជនកម្ពុជាវិសាមញ្ញកន្លងមក។

សម្ដេចបានឯកភាពចំពោះការវាយតម្លៃ នៃទំនាក់ទំនងរវាងប្រទេសទាំងពីរដោយបានបញ្ជាក់ថា ទំនាក់​ទំនង​សេដ្ឋកិច្ច នឹងគាំទ្រឱ្យទំនាក់ទំនងនយោបាយ។

ក្នុងន័យនេះ ដោយឈរលើមូលដ្ឋាន​ដែលមានស្រាប់ គប្បីណាជំរុញទំនាក់ទំនងសេដ្ឋកិច្ច រវាងប្រទេស​ទាំងពីរ​ឲ្យកាន់តែខ្លាំងឡើងថែមទៀត ជាពិសេសបន្តការកែប្រែតំបន់អតីតសង្គ្រាម តំបន់ព្រំដែន​ឲ្យទៅជា​តំបន់​សន្តិភាព អភិវឌ្ឍ និងកិច្ចសហប្រតិបត្តិការ។

ឆ្លៀតឱកាសនោះ សម្ដេចក៏បានសម្ដែងនូវការអបអរសាទរជូនចំពោះរដ្ឋាភិបាលវៀតណាម គណបក្ស​កុម្មុយនីស្ត​វៀត​ណាម ដែលបានទទួលជោគជ័យក្នុងការប្រយុទ្ធប្រឆាំងជំងឺកូវីដ១៩៕ អត្ថបទ៖ មុត សុទ្ធ



​