ព្រះវិហារ៖ ជំនន់ទឹកភ្លៀងនៅខេត្តព្រះវិហារ បណ្ដាលឲ្យលិចលង់ផ្ទះសម្បែង ដំណាំកសិកម្ម និងហេដ្ឋារចនាសម្ព័ន្ធជាច្រើនទៀត ហើយពលរដ្ឋប្រមាណ ១១គ្រួសារ ស្មើនឹងជាង៥០នាក់ ត្រូវបញ្ជូនទៅកាន់ទីទួលមានសុវត្ថិភាព ប៉ុន្តែយ៉ាងណាស្ថានភាពទឹកជំនន់បានស្រកបន្តិច បើធៀបនឹងម្សិលមិញ ហើយឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងអាជ្ញាធរខេត្តបានចុះពិនិត្យទីតាំងរងគ្រោះផ្ទាល់ ។

ឯកឧត្តម គីម រិទ្ធី អភិបាលខេត្តព្រះវិហារ មានប្រសាសន៍ថា គិតត្រឹមរសៀលថ្ងៃទី២២ ខែសីហា ឆ្នាំ២០២២ ភ្លៀងបានធ្លាក់នៅគ្រប់ក្រុងស្រុក មានកម្រិតពី៤មីលីម៉ែត្រ ទៅ៤៥មីលីម៉ែត្រ ក្នុងនោះអាងទឹករក្សាមានកម្ពស់ ៤៣.៦០ម៉ែត្រ បើធៀបនឹងថ្ងៃម្សិលមិញ ទឹកស្រុកចុះ០.១០ម៉ែត្រ ។ ដោយឡែកកម្ពស់ទឹកស្ទឹងសែន នៅទីរួមខេត្តមានកម្ពស់ ១០.៩០ម៉ែត្រ បើធៀបនឹងថ្ងៃម្សិលមិញ ទឹកស្រុកចុះ ០.០២ម៉ែត្រ ដែលកម្រិតកម្ពស់ទឹកប្រកាសអាសន្ន ១១.៥០ម៉ែត្រ ។

ឯកឧត្តមបន្តថា ជំនន់ទឹកភ្លៀងបានស្រកពីឃុំស្រអែម ទៅជន់លិចនៅឃុំកន្ទួត ស្រុកជាំក្សាន្ត បណ្តាលឱ្យមានផលប៉ះពាល់ធ្ងន់នៅភូមិស្រអែមខាងត្បូង ហៅភូមិប្រាសាទ១០ ហើយប្រជាជនទៅជុំវិញទីសុវត្ថិភាព ដែលមានកម្ពស់៣ម៉ែត្រពីទឹក ចំនួន៦៩គ្រួសារ ស្មើនឹង២៩៦នាក់ ក្នុងនោះបានជម្លៀស ១១គ្រួសារ ស្មើនឹង៥២នាក់ មកវត្តស្រអែម ហើយក្រុង-ស្រុកចំនួន៧ទៀត ពុំទាន់មានផលប៉ះពាល់ពីជំនន់ទឹកភ្លៀងនៅឡើយ តែកម្លាំងអន្តរាគមន៍ជួយសង្គ្រោះ បានត្រៀមលក្ខណសម្បត្តិគ្រប់គ្រាន់ក្នុងភូមិសាស្រ្តរៀងខ្លួនៗ ។  

ក្នុងឱកាសចុះពិនិត្យស្ថានភាពទឹកជំនន់ នៅឃុំជាំក្សាន្ត និងឃុំកន្ទួត ស្រុកជាំក្សាន្ត នៅរសៀលថ្ងៃទី២២នេះ ឯកឧត្តមទេសរដ្ឋមន្ត្រី គន់ គីម បានឆ្លៀតនាំយកការផ្តាំផ្ញើសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនពលរដ្ឋរងគ្រោះក្នុងឃុំទាំងពីរ ហើយសម្ដេចទាំងទ្វេ បានយកចិត្តទុកដាក់ខ្ពស់បំផុត ចំពោះពលរដ្ឋរងគ្រោះ ហើយចេញបទបញ្ជាយ៉ាងម៉ឺងម៉ាត់ឱ្យគណៈកម្មាធិការជាតិគ្រប់គ្រងគ្រោះមហន្តរាយ ពិសេសឯកឧត្តមផ្ទាល់ ត្រូវតែមានវត្តមាននៅកន្លែងរងគ្រោះ និងត្រៀមដោះស្រាយការលំបាករបស់ពលរដ្ឋ ។

ជាមួយនេះ ឯកឧត្តម បានអំពាវនាវដល់ប្រជាពលរដ្ឋ ឱ្យប្រយ័ត្នប្រយែងកូនចៅតូចៗ ដើម្បីចៀសវាងពីគ្រោះអកុសលនានាក្នុងគ្រាទឹកជំនន់នេះ ហើយបានក្រើនរំលឹកដល់អាជ្ញាធរ ឱ្យបង្កើនការយកចិត្តទុកដាក់ ចំពោះសុវត្ថិភាពរបស់ប្រជាពលរដ្ឋ និងការខ្វះខាតរបស់ប្រជាពលរដ្ឋក្នុងគ្រាជួបគ្រោះជំនន់ទឹកភ្លៀងនេះ ហើយក៏បានណែនាំអាជ្ញាធរ ឱ្យស្រង់ទិន្នន័យផលដំណាំសន្ទូងស្រូវរបស់ប្រជាពលរដ្ឋ ដែលរងការខូចខាត ហើយត្រូវត្រៀមលក្ខណៈក្នុងការបង្កបង្កើនផលឡើងវិញ ៕

អត្ថបទ ៖ ឧត្ដម