ភ្នំពេញ៖ សម្តេចតេជោ ហ៊ុន សែន បញ្ជាក់ថា នៅឆ្នាំ២០២៣ខាងមុខនេះ មន្ត្រីរាជការស៊ីវិល កងកម្លាំងប្រដាប់អាវុធគ្រប់ប្រភេទ និងនិវត្តជន សុទ្ធតែទទួលបានការដំឡើងប្រាក់​បៀរវត្សរ៍​ទាំងអស់ ដើម្បីជំរុញនិងបង្កើនល្បឿន នៃកម្រិតជីវភាព។

ថ្លែងក្នុងពិធីប្រគល់សញ្ញាបត្រ ជូននិស្សិតជ័យលាភី របស់សាកលវិទ្យាល័យអាស៊ី-អឺរ៉ុប ប្រមាណ ៣,០៧៥នាក់ ថ្ងៃទី២៣ ខែសីហា ឆ្នាំ២០២២ ធ្វើឡើងនៅអគារពាណិជ្ជកម្ម និងពិព័រណ៍ជ្រោយចង្វារ សម្តេចតេជោ ហ៊ុន សែន នាយករដ្ឋមន្រ្តីកម្ពុជា ក្នុងរយៈពីរឆ្នាំចុងក្រោយនេះ ឆ្នាំ២០២០ ​និង២០២១ មន្ត្រីរាជការស៊ីវិល កងកម្លាំងប្រដាប់អាវុធគ្រប់ប្រភេទ​ និងនិវត្តជន មិនត្រូវបានដំឡើង​ប្រាក់​បៀរ​វត្សរ៍ទេ ដោយសាររាជរដ្ឋាភិបាល​ ខិតខំ​សន្សំសំចៃថវិកា​ដើម្បីចំណាយលើការប្រយុទ្ធ​ប្រឆាំងកូវីដ ១៩។

សម្តេចតេជោ ហ៊ុន សែន បន្តថា រយៈពេលពីរឆ្នាំចុងក្រោយនេះ រាជរដ្ឋាភិបាលមានការចំណាយ​ច្រើន ​ទន្ទឹមពេលដែលចំណូលមានការធ្លាក់ចុះ ​ដោយសារការបិទប្រទេស​ ហើយសកម្មភាពការ​នាំចេញ នាំចូល និងសកម្មភាពសេដ្ឋកិចុ្ចពាណិជ្ជកម្ម ក៏បានថមថយ។

បច្ចុប្បន្ននេះ ចំណាយមានការថមថយបន្តិច លើការងារព្យាបាលព្យាបាលកូវីដ១៩ ខណៈចំណូល​បាន​កើន​ឡើង​វិញ។ប្រមុខរាជរដ្ឋាភិបាល​ បញ្ជាក់ថា ការដំឡើងប្រាក់បៀរវត្សរ៍នេះ គឺផ្តល់អាទិភាព​លើវិស័យអប់រំ ​និង​វិស័យសុខាភិបាល ​ដែល​គ្រូបង្រៀន និងគ្រូពេទ្យជាអាទិភាព ដែលទទួលបានប្រាក់ខែខ្ពស់ជាងគេ៕ អត្ថបទ៖ វណ្ណៈ