ភ្នំពេញ៖ ក្រុមការងារគ្រូពេទ្យ នៃការិយាល័យសុខាភិបាល ស្រុកប្រតិបតិ្តពោធិ៍សែនជ័យ (ហៅកាត់​OD ពោធិ៍សែនជ័យ) បានសម្រុកចាក់វ៉ាក់សាំងបង្ការជំងឺកូវីដ-១៩ ដូសជំរុញ ទី៣ ទី៤ និងទី៥ ជូនបងប្អូនកម្មករ កម្មការិនី គ្រប់ផ្នែក ​នៃរោងចក្រ ថបសាមីត ខណ្ឌកំពូល រាជធានីភ្នំពេញ។

លោកវេជ្ជបណ្ឌិត ហែម ចាន់យុទ្ធី ប្រធានការិយាល័យសុខាភិបាល ​ស្រុកប្រតិបត្តិពោធិ៍សែនជ័យ ប្រាប់ BTV ព័ត៌មាន ​នាព្រឹកថ្ងៃទី២៣ ខែសីហា ឆ្នាំ២០២២នេះថា សកម្មភាពចាក់វ៉ាក់សាំងបង្ការ​ជំងឺ​កូវីដ-១៩ ជូនបងប្អូនកម្មករ កម្មការិនី នៅតំបន់រោងចក្រ ​បានចាប់ផ្តើមកាលពីថ្ងៃទី២២ ខែសីហា ម្សិលមិញនេះ ដោយចាក់វ៉ាក់សាំងជូនពួកគាត់ បានចំនួន២៧៣០នាក់ ដើម្បីការពារបងប្អូនកម្មករ កម្មការិនី ជៀសផុតពីការរីករាលដាលជំងឺកូវីដ១៩ ​និងកុំឲ្យប៉ះពាល់ដល់ខ្សែសង្វាក់ផលិតកម្មរបស់​រោងចក្រផងដែរ។

ទន្ទឹមគ្នានោះដែរ កម្មករ កម្មការិនី និយោជិត​ ដល់វេណមកទទួលការចាក់វ៉ាក់សាំងបង្ការជំងឺកូវីដ-១៩ ដូសជំរុញពីក្រុមការងារគ្រូពេទ្យនៃការិយាល័យសុខាភិបាល ​ស្រុកប្រតិបតិ្តពោធិ៍សែនជ័យ បាន​ថ្លែងអំណរគុណជូនចំពោះប្រមុខរាជរដ្ឋាភិបាល ​ក៏ដូចជាក្រសួងសុខាភិបាល ​និងក្រុមហ៊ុន បាន​ខិតខំ​ស្វែងរកវ៉ាក់សាំង ​និងអនុញ្ញាត​ឲ្យក្រុមការងារគ្រូពេទ្យ ចុះមកចាក់វ៉ាក់សាំងដល់កន្លែង​បំពេញ​ការងារ ដើម្បីសង្រ្គោះ ​និងទប់ស្កាត់ ​គេចផុតពីការចម្លងមេរោគកូវីដ-១៩។

ជាចុងក្រោយលោក​ ហែម ចាន់យុទ្ធី បន្តអំពាវនាវដល់ប្រជាពលរដ្ឋចូលរួម​អនុវត្តវិធាន​ការ​សុខា​ភិបាល ៣កុំ ៣ការពារ ​ជាពិសេសចូលរួមមក​ទទួល​យក​ការចាក់វ៉ាក់សាំង​បង្ការជំងឺកូវីដ-១៩ ពី​ក្រុមគ្រូពេទ្យឲ្យបានគ្រប់ៗគ្នា គ្រប់ដូស ​តាមគោលការណ៍ណែនាំរបស់​ប្រមុខរាជរដ្ឋាភិបាល និង​ក្រសួងសុខាភិបាល ដើម្បីបង្កើនអង់ទីគ័រ​ ការពារជំងឺកូវីដ-១៩នេះ៕ អត្ថបទ រដ្ឋា