ភ្នំពេញ៖ ឧត្តមសេនីយ៍ឯក នាក់ យុទ្ធា ប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងគ្រឿងញៀន បានឱ្យដឹងថា ការផលិតគ្រឿងញៀនបែបសំយោគកាន់តែសកម្មនៅក្នុងតំបន់ត្រីកោណមាស កំពុងជះផលប៉ះពាល់កាន់តែខ្លាំងទៅលើប្រទេសក្នុងតំបន់ ដែលក្នុងនោះមានទាំងប្រទេសកម្ពុជាផងដែរ ។
ក្នុងកិច្ចប្រជុំ ស្ដីពីការត្រួតពិនិត្យ និងការពង្រឹងយន្តការ នៃគណៈកម្មាធិការប្រយុទ្ធប្រឆាំងគ្រឿង ញៀន និងគណៈកម្មាធិការប្រយុទ្ធនឹងជំងឺអេដស៍ កាមរោគ នៅថ្ងៃទី២៣ ខែសីហា នេះ ឧត្តមសេនីយ៍ឯក នាក់ យុទ្ធា បានបញ្ជាក់ថា ប្រទេសកម្ពុជា មានទីតាំងនៅជិតតំបន់ត្រីកោណមាស ដោយមិនអាចគេចផុត អំពីការហៀរចូលមកនៃគ្រឿងញៀនពីតំបន់នេះបាននោះទេ។
ឧត្តមសេនីយ៍ឯក បានឱ្យដឹងថា រយៈពេលចុងក្រោយនេះ តំបន់ត្រីកោណមាស បានប្រែក្លាយពី ការផលិតអាភៀន ឬគ្រឿងញៀន ពីការផលិតបែបធម្មជាតិ មកផលិតបែបគ្រឿងញៀនសំយោគយ៉ាងសកម្ម ដូច្នេះ កម្ពុជា ក៏បានទទួលរងយ៉ាងធំធេងដែរ ដោយពួកគេបានដឹកជញ្ជូនមកកម្ពុជា ហើយដឹកបន្ត ទៅកាន់ប្រទេសទី៣ តាមផ្លូវទឹក និងផ្លូវអាកាស ជាដើម ខណៈក៏មានការប៉ុនប៉ងយកកម្ពុជាធ្វើជាទីកន្លែង កែច្នៃផលិតផងដែរ។
បរិមាណគ្រឿងញៀន ដែលចាប់បាននៅប្រទេសកម្ពុជា កើនឡើង ដែលទាំងនេះ មិន មែនជាបញ្ហាដោយឡែកសម្រាប់តែកម្ពុជានោះទេ ប៉ុន្តែវាជាបញ្ហារួមរបស់តំបន់ ព្រោះប្រទេសក្នុងតំបន់ ក៏ មានការកើនឡើងផងដែរ ។
ឯកឧត្តម កៅ ខុនដារ៉ា រដ្ឋលេខាធិការក្រសួងមហាផ្ទៃ បានបញ្ជាក់ថា ប្រភេទគ្រឿងញៀន ដែល បង្ក្រាបបានច្រើនជាងគេបច្ចុប្បន្ននេះ គឺប្រភេទ ICE ដែលគ្រឿងញៀនប្រភេទនេះ បង្កគ្រោះថ្នាក់កាន់តែធ្ងន់ធ្ងរដល់អ្នកប្រើ ហើយនៅមុនឆ្នាំ២០១៥ កម្ពុជា អាចនិយាយបានថា គ្រាន់តែជាប្រទេស ដែលទទួលរងនូវផលប៉ះពាល់តិចតួចជាងគេក្នុងតំបន់ ប៉ុន្តែបច្ចុប្បន្ន កំពុងទទួលរងផលប៉ះពាល់ខ្លាំង ដូចបណ្ដាប្រទេសផ្សេងៗទៀត ។
ឯកឧត្តម បានបញ្ជាក់ទៀតថា ទិសដៅបន្ត ការប្រយុទ្ធប្រឆាំងបញ្ហាគ្រឿងញៀននេះ ត្រូវពិនិត្យលើ ការអនុវត្ត និងលទ្ធផលការងារ, ពិនិត្យពិភាក្សាលើការអនុវត្តខ្លឹមសារគោលនយោបាយ ផែនការយុទ្ធសាស្ត្រ បទបញ្ជា និងសេចក្តីណែនាំ និងបន្តពិនិត្យ និងឯកភាព រួមគ្នាដាក់ចេញនូវផែនការសកម្មភាពចំពោះមុខច្បាស់លាស់មួយ ដើម្បីបញ្ជាក់ និងធានាថា ក្រសួងមហាផ្ទៃ ពិតជាបានចូលរួមអនុវត្តពេញលេញ និងជាពហុវិស័យក្នុងការឆ្លើយតបចំពោះបញ្ហាគ្រឿងញៀន មេរោគអេដស៍ ជំងឺអេដស៍ និងកាមរោគ ។
បញ្ហាគ្រឿងញៀន កំពុងបង្កការព្រួយបារម្ភយ៉ាងខ្លាំងនៅកម្ពុជា ដែលសមត្ថកិច្ច បានបង្ក្រាបករណី គ្រឿងញៀន មានទាំងការជួញដូរ ការស្ដុកទុក និងការផលិត ជាដើម ក្នុងចំនួនច្រើនតោន៕
អត្ថបទ៖ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
