ភ្នំពេញ៖ មូលនិធិជាតិជំនួយសង្គមជាស្ថាប័នថ្មី របស់ក្រសួងសង្គមកិច្ច អតីតយុទ្ធជន យុវនីតិសម្បទា កំពុងបំពេញការងារផ្តោតសំខាន់ជួយដល់ប្រជាពលរដ្ឋ ពិសេសពលរដ្ឋស្ថិតក្នុងក្រុមងាយរងគ្រោះ។ មូលនិធីនិធិ នេះមានកញ្ចប់ថវិការហូតដល់ប្រមាណ ៧០០លានដុល្លារក្នុងឆ្នាំ ២០២៣ សម្រាប់អនុវត្តកម្មវិធីជំនួយសង្គមជាច្រើន។

មូលនិធិជាតិជំនួយសង្គម ក្នុងឆ្នាំ ២០២៣ ខាងមុខ គឺមានកាតព្វកិច្ចសំខាន់អនុវត្តកម្មវិធី​ជំនួយ​សង្គមជាច្រើន​។ មូលនិធិនេះ គឺមានថវិការហូតដល់ប្រហែល ៧០០លានដុល្លារ សម្រាប់ឆ្នាំ២០២៣ខាងមុខ។ នេះជាការលើកឡើងរបស់ឯកឧត្តម សំហេង បុរស ជាប្រធានក្រុមប្រឹក្សាភិបាលមូលនិធិជាតិជំនួយសង្គម នៅថ្ងៃទី ២៣ ខែ សីហានេះ។

ឯកឧត្តម បន្តថា កញ្ចប់ថវិកានេះ​គឺសម្រាប់អនុវត្តកម្មវិធីជាច្រើន​ ទាំងកម្មវិធីដែលមានស្រាប់ និងកម្មវិធីថ្មី ​ដែលនឹងផ្ដល់ការជួយឧបត្ថម្ភដល់ប្រជាពលរដ្ឋក្បែរភាពក្រីក្រផងដែរ។ សម្រាប់វិសាលភាព ​គ្រួសារក៏ដូចជាប្រជាពលរដ្ឋទទួលផល គឺនឹងកាន់តែរីកធំ ក្នុងក្នុងឆ្នាំ ២០២៣ខាងមុខ។

ក្នុងដំណាក់កាលនេះ ក្រុមការងារជំនាញក៏ព្យាយាមកំណត់​អត្តសញ្ញាណគ្រួសារ​ដែលស្ថិត​នៅក្បែរបន្ទាត់ក្រីក្រផងដែរ។ នេះជាការបញ្ជាក់ថែមរបស់ឯកឧត្តម។

ពាក់ព័ន្ធនឹងការបំពេញកាតព្វកិច្ចសំខាន់ៗទាំងនេះ ឯកឧត្តម វង សូត រដ្ឋមន្រ្តីក្រសួងសង្គមកិច្ច ក៏បានលើកឡើងចំពោះមន្រ្តីពាក់ព័ន្ធទាំងអស់ដែរថា ​គ្រប់ស្ថាប័នប្រតិបត្តិ រួមទាំងមន្រ្តីមូលដ្ឋាន​ជាពិសេសថ្នាក់ឃុំសង្កាត់ ​ដែលធ្វើការផ្ទាល់ជាមួយពលរដ្ឋ ​ត្រូវតែពង្រឹងសមត្ថភាព បំពេញការងារ​ដោយ​ទំនួលខុស​ត្រូវខ្ពស់​ ដើម្បីធានាថា ​ថវិកាទាំងឡាយដែលរាជរដ្ឋាភិបាលផ្ដល់ជូន ពិតជាបាន​ទៅ​ដល់ដៃប្រជាពលរដ្ឋជាក្រុមគោលដៅពិតប្រាកដ៕ អត្ថបទ៖ គឹមហុក