កំពង់ចាម៖ ពលរដ្ឋដែលបានទទួលវ៉ាក់សាំងបង្ការកូវីដ-១៩ ក្នុងស្រុកកោះសូទិន ខេត្តកំពង់ចាម បានលើកឡើងថា វ៉ាក់សាំងនេះ មិនត្រឹមការពារជំងឺកូវីដ-១៩ទេ ប៉ុន្តែថែមទាំងអាចទប់ទល់​នឹង​ជំងឺឯទៀតបានផងដែរ។

ប្រជាពលរដ្ឋក្នុងស្រុកកោះសូទិន ខេត្តកំពង់ចាម បានលើកឡើងពីបទពិសោធន៍ក្រោយ​ពី​ទទួល​បានវ៉ាក់សាំង បង្ការកូវីដ-១៩រួចមក ​ដែលមិនត្រឹមតែជាខែការពារ ទប់ស្កាត់កូវីដ-១៩ប៉ុណ្ណោះទេ ប៉ុន្ដែអាចទប់ទល់នឹងជំងឺដទៃទៀតផង សម្រាប់អ្នកភូមិខ្លះ។

ពួកគេ បានបញ្ជាក់ថា​ ឲ្យតែអាជ្ញាធរ ឬក្រុមគ្រូពេទ្យអំពាវនាវឲ្យទៅទទួលវ៉ាក់សាំង គឺមិនដែលរួញរា​ឡើយ ដោយបន្តចាក់គ្រប់ដូសតាមកាលកំណត់។

លោក សំរឹទ្ធ វ៉ាន់ឌី ប្រធានមណ្ឌលសុខភាពកំពង់រាប​ ក្នុងស្រុកកោះសូទិន ​បានឲ្យដឹងដែរថា បច្ចុប្បន្ន អ្នកភូមិ ​មិនថាក្មេង ឬមនុស្សចាស់ ​នៅពេលពួកគេមកទទួលវ៉ាក់សាំងរួច តែងតែលើក​ឡើង​ពី​ការជាសះស្បើយជំងឺផ្សេងៗ ហើយពួកគេសប្បាយរីករាយ ក្នុងការមកការចាក់ទទួល​វ៉ាក់សាំង ។

ក្នុងក្របខណ្ឌខេត្តកំពង់ចាម ក្រុមគ្រូពេទ្យ បានបន្តយុទ្ធការផ្តល់វ៉ាក់សាំងបង្ការជំងឺកូវីដ-១៩ នៅ​តាមមូលដ្ឋាន ​ ហើយបើយោងតាមរបាយការណ៍របស់មន្ទីរសុខាភិបាលខេត្ត ​បានឲ្យដឹងថា គិតត្រឹមថ្ងៃទី២២ ខែសីហា នេះ ​ប្រជាពលរដ្ឋ ដែលបានទទួលវ៉ាក់សាំងដូសទី១ ប្រមាណជាង ៧៩ម៉ឺននាក់, ដូសទី២ ប្រមាណជាង៧៣ម៉ឺននាក់ ដូសទី៣​ ប្រមាណជាង៤៨ម៉ឺននាក់ ដូសទី៤ ជាង១១ម៉ឺននាក់ និងដូសទី៥ ទើបបានជាង៩ពាន់នាក់៕

អត្ថបទ៖ ថុង សីហា