អន្ដរជាតិ៖ នៅថ្ងៃអង្គារនេះ ប្រធានាធិបតីកោះតៃវ៉ាន់ លោកស្រី សៃ អ៊ីងវិន(Tsai Ing-wen) បានលើកឡើងថា ជម្លោះ​ប្រដាប់​អាវុធកាលពី​ឆ្នាំ១៩៥៨ គឺជាឧទាហរណ៍មួយនៃដំណោះស្រាយរបស់កោះមួយនេះ ក្នុងការការពារខ្លួន ខណៈពេលដែល​លោកស្រី បានជួប​ពិភាក្សាការងារជាមួយក្រុមតំណាងរាស្រ្តជប៉ុន ស្របពេលភាពតានតឹងឡើងកម្តៅខ្លាំង​បំផុតជាមួយចិន ក្នុងរយៈ​ពេល​ជាច្រើនទសវត្សរ៍កន្លងមកនេះ។

ក្រុមតំណាងរាស្រ្តសហរដ្ឋអាមេរិក និងក្រុមតំណាងរាស្ត្រជប៉ុន បានក្លាយជាគណៈប្រតិភូចុងក្រោយគេដែល​បំពេញ​ទស្សនកិច្ចទៅកាន់កោះតៃវ៉ាន់ រយៈពេលប៉ុន្មានសប្តាហ៍ប៉ុណ្ណោះ ក្រោយពេល​ចិន​បង្ហាញប្រតិកម្មខ្លាំងចំពោះដំណើរទស្សន​កិច្ច​របស់​ប្រធានសភាអាមេរិកលោកស្រី ណានស៊ី ប៉េឡូស៊ី ទៅកាន់កោះតៃវ៉ាន់ ជាមួយនឹងការធ្វើសមយុទ្ធយោធាទ្រង់ទ្រាយធំ រួមទាំងការបាញ់មីស៊ីលរំលងកោះ​មួយនេះ និងបញ្ជូននាវាចម្បាំងឆ្លងកាត់ខ្សែបន្ទាត់កណ្តាលច្រកសមុទ្រតៃវ៉ាន់៕