បាល់ទាត់៖ កីឡដ្ឋានធំ ឬ Main Stadium នៃពហុកីឡដ្ឋានជាតិមរតកតេជោ ដែលជាទីតាំងត្រៀមស្វាគមន៍ព្រឹត្តិការណ៍ប្រវត្តិសាស្ត្រ កីឡាស៊ីហ្គេមឆ្នាំ២០២៣ នៅកម្ពុជាបានសម្រេចការសាងសង់បាន ៩៥% ហើយ ខណៈគម្រោងយក្សនេះនឹងបញ្ចប់នៅអំឡុងខែឧសភាខាងមុខ។ នេះបើតាមការបញ្ជាក់របស់ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC)។
ឯកឧត្ដម វ៉ាត់ ចំរើន បានថ្លែងប្រាប់អ្នកសារព័ត៌មាន ខណៈចុះពិនិត្យវឌ្ឍនភាពនៃការសាងសង់កាលពីចុងសប្ដាហ៍កន្លងទៅថា ទោះបីស្ថានភាពជំងឺកូវីដ-១៩ មានការរីករាលដាលខ្លាំងក្នុងសហគមន៍ តែដំណើរការសាងសង់កីឡដ្ឋានស្តង់ដារអន្តរជាតិនេះ នៅតែដំណើរការជាប្រក្រតី ពិសេសបច្ចុប្បន្នក្រុមការងារសាងសង់កំពុងសម្រុកបំពាក់កៅអី ដោយគិតត្រឹមថ្ងៃទី៣ ខែមេសាគឺបំពាក់បានជាង ២២,២០០កៅអីហើយ ទន្ទឹមជាមួយគ្នាការងារទីលាននៃកីឡដ្ឋានធំនេះ ក៏មានការវិវត្តន៍យ៉ាងល្អប្រសើរផង ពិសេសការដុះដាំស្មៅធម្មជាតិដែលទទួលបានការពិសោធន៍ដោយជោគជ័យ បន្ទាប់ពីភាគីចិនបានជ្រើសរើសយកពូជស្មៅល្បីៗ និងល្បីៗ ៥ប្រភេទមកតេស្ដលើទីលាន និងបរិយាកាសននៅកម្ពុជា ហើយមានស្មៅ ១ប្រភេទដែលដុះលូតលាស់ល្អ។ នេះបើតាមការបញ្ជាក់របស់ឯកឧត្ដម វ៉ាត់ ចំរើន រដ្ឋលេខាធិការក្រសួងទេសចរណ៍ដដែល។ អគ្គលេខាធិការគណៈកម្មាធិការជាតិ CAMSOC ដដែលបន្ដថា ជារួមមកទល់ពេលនេះ ក្នុងចំណោមការសាងសាងសង់នៅសល់ ៥% គឺកំពុងដំណើរការជាបណ្ដើរៗ ហើយតាមគម្រោងក្រោយបញ្ចប់ការងារទីលានបាល់ទាត់ ក្រុមការងារសាងសង់នឹងបន្ដក្រាលពីស ឬផ្លូវរត់អត្តពលកម្ម ដែលជាពីសស្ដង់ដារអន្តរជាតិ ហើយបានកម្មង់ពីប្រទេសបារាំងដើម្បីត្រៀមក្រាលដោយប្រើពេល ១ ទៅ ២សប្ដាហ៍នាដើមខែឧសភា។
ចំពោះហេដ្ឋារចនាសម្ព័ន្ធមួយចំនួនទៀត ដូចអាងទឹកព័ន្ធជុំវិញកីឡដ្ឋានធំក៏កំពុងរៀបចំ និងលេចចេញជារូបរាង ខណៈតាមការរាយការណ៍ អាងទឹកនឹងរួចរាល់ក្នុងពេលឆាប់ៗ ដោយរចនាសម្ព័ន្ធតាមស្ថាបត្យកម្មអង្គរ ដែលផ្ដល់នូវធាតុត្រជាក់ក្នុងពហុកីឡដ្ឋានជាតិមរតកតេជោ ។ រីឯផ្លូវជុំវិញកីឡដ្ឋានធំក៏ត្រូវអ៊ុតបេតុងដ៏ប្រណិតនាពេលឆាប់ៗ។ ចំណែកការតុបតែងផ្នែកខាងក្នុង និងខាងក្រៅផ្សេងទៀត ពិសេសសណ្ឋាគារ និងកន្លែង VIP ដែលបម្រើមុខងារជាច្រើនក្នុងកីឡដ្ឋានដ៏ទំនើបនេះក៏បានកំពុងរៀបចំ និងជិតរួចរាល់ដែរ។ គួរដឹងថា កីឡដ្ឋានធំ នៃពហុកីឡដ្ឋានជាតិមរតកតេជោ បានបើកការដ្ឋានសាងសង់កាលពីថ្ងៃទី០៤ ខែមេសា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជាជំនួយឥតសំណងរបស់រដ្ឋាភិបាល សាធារណរដ្ឋប្រជាមានិតចិន និងប្រជាជនចិនក្នុងទំហំទឹកប្រាក់ប្រមាណ ១៦០លានដុល្លារ។ សមិទ្ធផលដ៏អស្ចារ្យនេះអាចផ្ទុកអ្នកទស្សនាបានប្រមាណ ៦ម៉ឺននាក់នេះ ដើម្បីត្រៀមស្វាគមន៍ព្រឹត្តិការណ៍ស៊ីហ្គេមនៅកម្ពុជានាឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
