​​បាល់ទាត់​៖ ​ក្លិប​ Leicester City ជាថ្មី​ម្តងទៀត​បាន​បដិសេធ​សំណើ​ទិញ​ខ្សែ​ការពារ Wesley Fofana ពី​តោ​ខៀវ Chelsea ជា​លើក​ទី​៣​។ ​សំណើ​លើក​ទី​៣ របស់ Chelsea ត្រូវ​បាន​គេ​ដឹង​ថា​ក្នុង​តម្លៃ​ចន្លោះ​ពី ៦០ ទៅ ៧០​លាន​ផោន​។

​​Leicester City ចាប់ផ្តើម​រដូវ​កាល​នេះ​មិនទាន់​ឈ្នះ​នៅឡើយ ​ខណៈ Wesley Fofana មិន​ស្ថិត​ក្នុង​បញ្ជី​លក់​ចេញ​ឡើយ​។ ​ប្រសិនបើ Chelsea នៅតែ​បន្ត​ប៉ុនប៉ង​ចង់បាន​កីឡាករ​វ័យ ២១​ឆ្នាំ​ខ្សែការពារ​កណ្តាល​រូប​នេះ និង​ហ៊ាន​ឱ្យ​ថ្លៃ​លើស​ពី ៨០​លាន​ផោន​មានន័យថា Wesley Fofana នឹង​ក្លាយ​ជា​ខ្សែ​ការពារ​ដែល​មាន​តម្លៃ​ផ្ទេរ​ខ្ពស់​បំផុត​លើ​លោក​។ ​Wesley Fofana មិន​ស្ថិត​ក្នុង​បញ្ជី​ប្រកួត​របស់ Leicester City ឡើយ​កាលពី​ថ្ងៃ​សៅរ៍​។ ​Wesley Fofana បាន​មក​ដល់ Leicester City កាលពី​ឆ្នាំ​២០២០ ផ្ទេរ​ពី​ក្លិប​បារាំង Saint Etienne និង​បាន​ចុះហត្ថលេខា​រយៈពេល ៥ឆ្នាំ​នៅពេលនោះ​មានន័យថា ​គេ​នៅសល់​សុពលភាព​កិច្ចសន្យា ៣ឆ្នាំ​ទៀត​។

​​គេ​មិនទាន់​ដឹងថា Fofana មាន​ក្នុង​បញ្ជី​ឈ្មោះ​ប្រកួត​រឺ​អត់​ចុង​សប្តាហ៍​នេះ​នៅពេល Leicester City ធ្វើដំណើរ​ទៅ​ទឹកដី Stamford Bridge ជួប Chelsea​។​ សូមបញ្ជាក់ថា Chelsea បាន​ចំណាយលុយ​ប្រហែល ១៧០លាន​ផោន​ហើយ​ក្នុងការ​ទិញដូរ​កីឡាករ​រដូវក្តៅ​នេះ ហើយ​ថ្មីៗ​នេះ​ក៏​កំពុង​តាម​ទិញ​ខ្សែប្រយុទ្ធ Everton, Anthony Gordon ដែរ​ក្នុង​សំណើ​តម្លៃ ៤០លាន​ផោន​៕

​អត្ថបទ​៖​នាង សុភា​វុ​ធ