ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងពាក់ព័ន្ធ បានសម្រេចកាត់ឆ្វៀលដីព្រៃលិចទឹក នៅជុំវិញបឹងទន្លេសាប ចែកជូនប្រជាពលរដ្ឋសម្រាប់អាស្រ័យផល ដែលរហូតមកដល់ខែឧសភា ឆ្នាំ២០២២ មានចំនួនជាង ២ម៉ឺនហិកតា ជូនប្រជាពលរដ្ឋជាង ១៧ ០០០គ្រួសារ ។

ក្នុងសន្និសីទសារព័ត៌មានស្តីពី លទ្ធផលសម្រេចបានរយៈពេល ៥ឆ្នាំរបស់ក្រសួងរៀបចំដែនដី នគរូបនីយកម្ម និងសំណង់ រៀបចំដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី២៤ ខែសីហា ឆ្នាំ២០២២ ឯកឧត្តម ថេង ច័ន្ទសង្វារ រដ្ឋលេខាធិការក្រសួង បានលើកឡើងថា ចាប់ពីអនុវត្តនូវបទ​បញ្ជា​របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីឆ្នាំខែវិច្ឆិកា ឆ្នាំ២០២១ ពាក់ព័ន្ធ​ការបង្ក្រាបការកាប់ទន្ទ្រានដីរដ្ឋ ក្នុងដែនព្រៃលិចទឹក នៃតំបន់បឹងទន្លេសាប គឺមានប្រជាពលរដ្ឋស្ម័គ្រ​ចិត្តបានប្រគល់ដីជូនរដ្ឋវិញចំនួនជាង ១៥ ០០០គ្រួសារ ស្មើនឹងផ្ទៃដីចំនួនជាង ៦៣ ០០០ហិកតា ។

ឯកឧត្តម បន្តថា ក្រសួង និងអាជ្ញាធរខេត្ត បានកប់គ្រាប់ត្នោតចំនួនជាង ៣៤ម៉ឺនគ្រាប់ នៅតំបន់ព្រៃលិចទឹក​ដែលបានកាប់ទន្ទ្រាន និងដាំដើមឈើមួយចំនួនទៀត ​មានដើមច្រកែង និងរាំង ដើមឫស្សី ដើមផ្ទោល ដើមរំដេញជាដើម ដែលសរុបទៅជាច្រើនម៉ឺនដើមទៀត។ កាលពីខែឧសភា ឆ្នាំ២០២២ បន្ទាប់ពីទទួលបទបញ្ជារបស់សម្ដចតេជោ​ គឺក្រសួងពាក់ព័ន្ធ បានកាត់ឆ្វៀល​ដីនៅជុំវិញ​បឹងទន្លេសាបជូនពលរដ្ឋទំហំជាង ២ម៉ឺនហិកតា ហើយបានផ្ដល់កម្មសិទ្ធិនូវផ្ទៃដីទំហំជាង ១១ ០០០ហិកតា ។

គួរបញ្ជាក់ថា កាលពីឆ្នាំ២០២១ សម្ដេចតេជោ ​បានបញ្ជាឲ្យបង្កើតគណៈកម្មការចម្រុះ ដើម្បីបង្ក្រាប​ករណីការលួចកាប់ទន្ទ្រានដៃព្រៃលិចទឹក ​នៅជុំវិញបឹងទន្លេសាប​ ដែលមាននៅខេត្តបាត់ដំបង ពោធិ៍សាត់ កំពង់ធំ កំពង់ឆ្នាំង សៀមរាប និងខេត្តបន្ទាយមានជ័យ ​ដោយដកហូតបានដីជាច្រើន​ម៉ឺនហិកតា រួមទាំងមានការចាប់ខ្លួនអ្នកប្រព្រឹត្តិល្មើសមួយចំនួនបញ្ជូនទៅ​ផ្ដន្ទាទោស​ផងដែរ ៕ អត្ថបទ៖ បាន សុខរិទ្ធិ