ភ្នំពេញ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា បាន​អនុញ្ញាតឱ្យ លោកស្រី Jyotsana Varma នាយកប្រចាំប្រទេស នៃធនាគារអភិវឌ្ឍន៍អាស៊ី ចូលជួបសម្ដែង​ការ​គួរសម និងពិភាក្សាការងារអំពីកិច្ចសហប្រតិបត្តិការលើវិស័យសុខាភិបាល នាព្រឹកថ្ងៃទី២៤ ខែសីហានេះ។

ឯកឧត្តមសាស្រ្តាចារ្យ ម៉ម ប៊ុនហេង បានស្វាគមន៍ និងអបអរសាទរយ៉ាងកក់ក្តៅចំពោះ វត្តមាន​របស់លោកស្រីនាយកប្រចាំប្រទេស ​ដែលត្រូវបានចាត់តាំងឱ្យមកបំពេញបេសកកម្មនៅកម្ពុជា នាពេលនេះ។

ឯកឧត្តមរដ្ឋមន្រ្តី ក៏បានថ្លែងអំណរគុណយ៉ាងជ្រាលជ្រៅចំពោះការគាំទ្រហិរញ្ញប្បទាន ឥណទាន សម្រាប់គម្រោងសន្តិសុខសុខភាព នៃមហាអនុតំបន់មេគង្គ ​ចាប់តាំងពីឆ្នាំ២០១៦មក និងការផ្ដល់​ឥណទានបន្ថែម ​សម្រាប់គម្រោងឆ្លើយតបនឹងការរាលដាលជំងឺកូវីដ-១៩។

លោកស្រី Jyotsana Varma នាយកប្រចាំប្រទេស ​បាន​សម្តែង​នូវការកោតសរសើរ​ចំពោះរាជ​រដ្ឋាភិបាល​កម្ពុជា និងក្រសួងសុខាភិបាល​ ដែលបានគ្រប់គ្រងការរីករាលដាល នៃជំងឺកូវីដ-១៩ ដោយជោគជ័យ។

លោកស្រីនាយកប្រចាំប្រទេស​ ក៏បានគូសរំលេច​ អំពីកិច្ចសហប្រតិបត្តិការប្រយុទ្ធ នឹងជំងឺឆ្លងក្នុង​មហា​អនុតំបន់មេគង្គ ដូចជា ​ការចែករំលែកព័ត៌មាន ​ការពង្រឹង​សមត្ថភាពមន្ទីរពិសោធន៍ ការការ​ពារត្រួត​ពិនិត្យការឆ្លងរោគនៅក្នុងមន្ទីរពេទ្យ ​ការពង្រឹងសមត្ថភាពត្រៀមរៀបចំ និងឆ្លើយតប​បន្ទាន់​ការរាលដាលជំងឺឆ្លងនានា ​ជាពិសេសជំងឺកូវីដ-១៩​ និងគម្រោង​ ព្រមានជាមុននៅកម្ពុជា (Cambodia Early Waming System)​ ក្នុងករណីមានការរាតត្បាតនៃជំងឺឆ្លងនានា ដូចជា ជំងឺកូវីដ-១៩ ជំងឺគ្រុនចាញ់ របេង និងអេដស៍។

លោកស្រីនាយកប្រចាំប្រទេស បានសម្តែងនូវអំណរគុណយ៉ាងជ្រាលជ្រៅចំពោះក្រសួង​សុខា​ភិបាល ​ដែលតែងសហការយ៉ាង​ជិតស្និទ្ធ​ជាមួយធនាគារអភិវឌ្ឍន៍អាស៊ី ក្នុងការអនុវត្តគម្រោង​នានា។ ស្រីលោក Jyotsana Varma នាយកប្រចាំប្រទេស ​ក៏បានស្នើសុំឯកឧត្តមរដ្ឋមន្ត្រី បន្តគាំទ្រ​កិច្ចសហប្រតិបត្តិការរវាងធនាគារ​អភិវឌ្ឍន៍អាស៊ី ​ជាមួយក្រសួងសុខាភិបាល។

ជាការឆ្លើយតបឯកឧត្តមរដ្ឋមន្ត្រី បានសម្ដែងអំណរគុណចំពោះធនាគារ​អភិវឌ្ឍន៍អាស៊ី ​ដែលតែងត គាំទ្រដល់កិច្ចសហប្រតិបត្តិការប្រយុទ្ធ នឹងជំងឺឆ្លងនៅតាមព្រំដែន នៃបណ្តាប្រទេសក្នុងមហា​អនុតំបន់​មេគង្គ និងបន្តគាំទ្រគម្រោងនេះជាបន្តទៀត៕ អត្ថបទ រដ្ឋា