​​បាល់ទាត់​៖ ​ក្លិប​បាល់ទាត់​ចំនួន ៣ បាន​ឆ្លង​ផុត​វគ្គ​ជំ​រុះ​ឆ្លង​ចូល​វគ្គ​វិលជុំ​ក្នុង​ពូ​ល​ក្របខណ្ឌ UEFA Champions League ហើយ​ក្រោយ​ការប្រកួត​ជំ​រុះ​ជុំ​ចុងក្រោយ​យប់មិញ​។ ​​ក្លិប​ព័រទុយហ្កាល់ Benfica មិន​លំបាក​ឡើយ​ក្រោយ​ឈ្នះ​ក្លិប​អ៊ុយ​ក្រែ​ន Dynamo Kyiv ជើង​ទី​ពីរ​នេះ ៣-០ នៅ​ទីក្រុង Lisbon បន្ទាប់ពី​ឈ្នះ​ជើង​ទី១ នៅ​ទឹកដី​ប៉ូឡូញ ២-០ សរុប​ទាំងពីរ​ជើង ៥-០​។

​​អតីត​ខ្សែការពារ Manchester City, Nicolas Otamendi, David Neres និង Rafa Silva សុទ្ធតែ​រក​គ្រាប់​បាល់​យប់មិញ​ធ្វើឱ្យ Benfica មានមុខ​នៅ UEFA Champions League លើក​ទី១២ ក្នុង​រយៈពេល ១៣រដូវ​កាល​ចុងក្រោយ​។ ​​ចំណែកឯ​ពីរ​ក្រុម​ផ្សេងទៀត​រួមមាន​ក្លិប​អ៊ីស្រាអែល Maccabi Haifa ស្មើ​នៅ​ទឹកដី Red Star Belgrade ២-២ ដោយ​គ្រាប់​បាល់​ចូល​ទី​ខ្លួនឯង​របស់ Red Star នៅ​ចុង​ម៉ោង​ធ្វើឱ្យ Maccabi Haifa ឈ្នះ​សរុប​ទាំងពីរ​ជើង​ប្រផិតប្រផើយ ៥-៤ ឡើង​ចូល​វគ្គ​វិលជុំ​ក្នុង​ពូ​ល UCL ជា​លើកដំបូង​តាំងពី​ឆ្នាំ​២០០៩​។

​​គូ​ចុង​ក្រោយនេះ​គឺ​ក្លិប​ឆេ​ក Viktoria Plzen បាន​យកឈ្នះ​ក្លិប​អា​ស៊ែ​បៃ​សង់ Qarabag ២-១ ជើង​ទី២ និង​សរុប​ទាំងពីរ​ជើង ៤-២​។ ​​វគ្គ​វិលជុំ​ក្នុង​ពូ​ល​នឹង​រកឃើញ​ ៣​ក្រុម​ចុងក្រោយ​ទៀត​យប់​នេះ​ដោយ​រួមមាន Rangers ទទួល PSV បន្ទាប់ពី​ជើង​ទី១ នៅ​ហូ​ឡង់​ស្មើគ្នា ២-២ ក្លិប​ន័​រវេ​ស Bodo/Glimt ទទួល Dinamo Zagreb បន្ទាប់ពី​ជើង​ទី១ នៅ​ទឹកដី​ក្រូ​អាស៊ី Bodo Glimt យកឈ្នះ ១-០ និងក្លិប​ដា​ណឺ​ម៉ាក Copenhagen ទទួល Tabzonspor បន្ទាប់ពី​ជើង​ទី១ នៅ​ទឹកដី​ទួ​ក​គី Copenhagen យកឈ្នះ ២-១៕

​អត្ថបទ​៖​នាង សុភា​វុ​ធ