កំពង់ធំ៖ ឯកឧត្តមទេសរដ្ឋមន្រ្តី គន់ គីម អនុប្រធានទី១ នៃគណៈកម្មាធិការជាតិគ្រប់គ្រង​គ្រោះ​មហន្តរាយ ថ្លែងថា មន្រ្តីទទួលបន្ទុកស្បៀងបម្រុងនឹងសិក្សាតំបន់ជន់លិចស្រូវ ដើម្បីស្តារឡើងវិញ ខណៈខេត្តកំពង់ធំនឹងទទួលបានការស្តារមុនគេ។

ថ្លែងប្រាប់BTV NEWS បន្ទាប់ពីចុះពិនិត្យស្ថានភាពផលប៉ះពាល់​ដំណាំដោយជំនន់​ទឹកភ្លៀង​ស្ថិតក្នុងសង្កាត់អូរកន្ធរ ក្រុងស្ទឹងសែន ខេត្តកំពង់ធំ ឯកឧត្តមទេសរដ្ឋមន្រ្តី គន់ គីម បានឱ្យដឹងថា បន្ទាប់ពីស្ថានភាពនៃជំនន់ទឹកភ្លៀងរយៈពេលប៉ុន្មានថ្ងៃចុងក្រោយ តាមបណ្តាខេត្តនានា​ជាប់ព្រំដែន​កម្ពុជា-ថៃ និងកម្ពុជា-ឡាវ បានហូរពីផ្នែកខាងលើនឹងបន្តមកដល់ផ្នែកខាងក្រោម បានបណ្តាល​ឱ្យខេត្ត​មួយចំនួន ពិសេសខេត្តកំពង់ធំ ទទួលរងផលប៉ះពាល់ដំណាំស្រូវរបស់​ប្រជាពលរដ្ឋច្រើន​ជាងគេ។

ឯកឧត្តមទេសរដ្ឋមន្រ្តី បន្តថា ក្នុងចំណោមខេត្តដែលប៉ះពាល់ដំណាំស្រូវ ខេត្តំពង់ធំមានស្រូវជន់លិច​ច្រើន​ជាង ៤ពាន់ហិកតា ដែលស្រូវជន់លិចនេះអាចប្រមូលផលបានតិចតួចតែប៉ុណ្ណោះ។

ឯកឧត្តមទេសរដ្ឋមន្រ្តី បញ្ជាក់ថា ជាយន្តការរបស់មន្រ្តីទទួលបន្ទុកស្បៀងបម្រុងនឹងសិក្សា​អំពីការ​តំបន់ជន់លិចស្រូវរបស់ប្រជាកសិករនៅតាមបណ្តាខេត្តដែលប៉ះពាល់ដោយទឹកជំនន់ ខណៈខេត្តកំពង់ធំនឹងសិក្សា ហើយទទួលបានការស្តារមុនគេ។

បើតាមរបាយការណ៍ គិតថ្ងៃចុងសប្តាហ៍កន្លងទៅ អំពីផលប៉ះពាល់ដំណាំស្រូវ ដែលបណ្តាលមក​ពីជំនន់ទឹកភ្លៀងមានដំណាំស្រូវសរុបជិត ៥ម៉ឺនហិកតា ខណៈដំណាំស្រូវដែលខូតខាត​មានជិត ២ម៉ឺនហិកតា។

ឯកឧត្តមទេសរដ្ឋមន្ត្រី គន់ គីម បានណែនាំអាជ្ញាធរឱ្យបន្តស្រង់ទិន្នន័យផលដំណាំ​សន្ទូង​ស្រូវរបស់ប្រជាពលរដ្ឋ ​ដែលរងការខូចខាត ឬប្រឈមនាពេលខាងមុខ ដើម្បីត្រៀម​លក្ខណៈ​ក្នុងការបង្កបង្កើនផលឡើងវិញ។ ​បន្ថែមលើសពីនេះ ទោះបីពុំប្រឈមទឹកជំនន់ធ្ងន់ធ្ងរក្តី ឯកឧត្តម​ទេសរដ្ឋមន្ត្រី គន់ គីម ​ក៏បានណែនាំប្រជាពលរដ្ឋឱ្យ​ប្រយ័ត្នប្រយែង​កូនចៅតូចៗ ដើម្បីចៀសវាង​ពី​គ្រោះអកុសលនានា​ពីទឹកជំនន់នេះ។

ឯកឧត្តមទេសរដ្ឋមន្ត្រី ​បានក្រើនរំលឹកដល់អាជ្ញាធរខេត្ត ស្រុក ឃុំ ឱ្យបង្កើនការយកចិត្តទុកដាក់​ចំពោះ​សុវត្ថិភាព​របស់ប្រជាពលរដ្ឋ និងការខ្វះខាត​របស់ប្រជាពលរដ្ឋក្នុងគ្រាជួប​គ្រោះជំនន់ទឹក​ភ្លៀងនេះ៕អត្ថបទ៖ ឧត្ដម