ភ្នំពេញ៖ ប៉ុន្មានឆ្នាំមកនេះ ចាប់តាំងពីមានវិបត្តិកូវីដ-១៩ រាជរដ្ឋាភិបាលកម្ពុជា បានទម្លាក់ថវិកាជាច្រើន ដើម្បីជួយឧបត្ថម្ភសាច់ប្រាក់ជូនគ្រួសារក្រីក្រ ដែលមានបណ្ណសមធម៌ទូទាំងប្រទេសរហូតដល់សព្វថ្ងៃ។

បញ្ហាកូវីដ-១៩នៅបន្ត និងមានបញ្ហាសាកលថ្មីៗបន្តកើតឡើងនាពេលបច្ចុប្បន្ន រាជរដ្ឋាភិបាលកម្ពុជា ដោយមានក្រសួងផែនការ និងក្រសួងសង្គមកិច្ច និងក្រសួងស្ថាប័នពាក់ព័ន្ធ ក៏បាននឹងកំពុងរៀបចំ​កម្មវិធីថ្មីមួយទៀត គឺឧបត្ថម្ភសាច់ប្រាក់ជូនគ្រួសារដែលស្ថិតនៅក្បែរបន្ទាត់ភាពក្រីក្រ។

រាជរដ្ឋាភិបាលកម្ពុជា កំពុងគិតគូបន្ថែមជួយដល់ប្រជាពលរដ្ឋដែលស្ថិតនៅក្បែរបន្ទាត់ភាពក្រីក្រ។នេះជាការបញ្ជាក់ ឯកឧត្តម សំហេង បុរស ប្រធានក្រុមប្រឹក្សាភិបាលមូលនិធិជាតិជំនួយសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា។

ឯកឧត្តម បានបញ្ជាក់ថា ក្រុមការងារជំនាញដោយមានអគ្គលេខាធិការដ្ឋានក្រុម​ប្រឹក្សា​ជាតិគាំពារ​សង្គម ​និងក្រសួងផែនការ កំពុងពិភាក្សាពីការត្រៀមដោះស្រាយផល​ប៉ះពាល់ដោយបញ្ហា​សេដ្ឋកិច្ច​ផ្សេងៗ​ជួយដល់ពលរដ្ឋដែលក្រីក្រ ​និងពលរដ្ឋដែលស្ថិតនៅក្បែរភាពក្រីក្រផងដែរ។

ឯកឧត្តម លើកឡើងបន្ថែមថា ក្នុងដំណាក់កាលនេះ គឺក្រសួងផែនការកំពុងធ្វើការ​សិក្សាពីកាត​កំណត់​អត្តសញ្ញាណគ្រួសារក្បែរភាពក្រីក្រ។ ក្នុងឆ្នាំ ២០២៣ខាងមុខ ​គឺមន្រ្តីជំនាញសង្ឃឹមថា កម្ពុជា​នឹងអាចដាក់ចេញនូវជំនួយបន្ថែមទៀត ​ជួយលដល់ពលរដ្ឋក្បែរភាពក្រីក្រ។

បច្ចុប្បន្នរាជរដ្ឋាភិបាលកម្ពុជា បាននឹងកំពុងបន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ ដែលចាប់​ផ្ដើមតាំងពីខែ មិថុនា ឆ្នាំ ២០២០ មកម្លេះ។ ​ចាប់តាំងពីការចាប់ផ្ដើមអនុវត្ត រហូតមក​ត្រឹមខែ កក្កដា ឆ្នាំ ២០២២ រាជរដ្ឋាភិបាលកម្ពុជា ​បានចំណាយថវិកាអស់ជាង ​៧៤៤លានដុល្លារ ក្នុងការជួយដល់គ្រួសារក្រីក្រជាប្រចាំខែ។ ​គិតត្រឹមពេលនេះ រាជរដ្ឋាភិបាលកម្ពុជា ក៏មិនទាន់មាន​ការប្រកាសបិទបញ្ចប់កម្មវិធីនេះនោះទេ។

ករណីឈានដល់ការបិទបញ្ចប់កម្មវិធីឧបត្ថម្ភសាច់ប្រាក់ជូនគ្រួសារក្រីក្រ រាជរដ្ឋាភិបាលក៏​នឹង​ដាក់ចេញកម្មវិធីថ្មីមួយទៀត ​គឺកម្មវិធីកញ្ចប់គ្រួសារ​ ជាកម្មវិធីទម្រ។ កម្មវិធីកញ្ចប់គ្រួសារ នឹងផ្តោតសំខាន់លើក្រុមគោលដៅចំនួន ៥ ៕ អត្ថបទ៖ គឹមហុក