ប្រធានាធិបតីសហរដ្ឋអាមេរិកលោក Joe Biden បានបញ្ជាឱ្យវាយប្រហារតាមអាកាស លើក្រុម ដែល​គាំទ្រ​ដោយ​ប្រទេសអ៊ីរ៉ង់ នៅក្នុងប្រទេសស៊ីរី កាលពីថ្ងៃអង្គារ រយៈពេល​ជាង​មួយ​សប្តាហ៍​បន្ទាប់​ពី​គ្រាប់​រ៉ុក្កែត​ច្រើន​គ្រាប់​បាន​វាយ​ប្រហារ​នៅ​ជិត​មូល​ដ្ឋាន​យោធា​មួយ​កន្លែង​នៅ​ភាគឦសាន​ប្រទេស​ស៊ីរី​ ដែល​ផ្តល់​មូលដ្ឋាន សម្រាប់ទាហានអាមេរិក។

ទី​បញ្ជាការកណ្តាលរបស់អាមេរិកបាននិយាយនៅក្នុងសេចក្តីថ្លែងការណ៍ថា ការ​វាយ​ប្រហារ​តាម​អាកាស​ធ្វើ​ឡើង​ដោយ​យោធា​អាមេរិក​បាន​ផ្តោត​លើ​ក្រុម​ដែល​គាំទ្រ​ដោយ​ប្រទេស​អ៊ីរ៉ង់​នៅ​ក្នុង​ទី​ក្រុង​ Deir ez-Zor ប្រទេសស៊ីរី។ លោក Joe Buccino អ្នកនាំពាក្យ និយាយ​នៅ​ក្នុង​សេចក្តី​ថ្លែង​ការណ៍​ថា ការវាយប្រហារបានផ្តោតលើ ហេដ្ឋា​រចនា​សម្ព័ន្ធ​ប្រើប្រាស់​ដោយ​ក្រុម​ដែល​មាន​ទំនាក់​ទំនង​ជា​មួយ​កង​ឆ្មាំបដិវត្តន៍អ៊ីស្លាមរបស់អ៊ីរ៉ង់។

តាមការណែនាំរបស់ប្រធានាធិបតី Biden កង​កម្លាំង​យោធា​អាមេរិក​បាន​ធ្វើ​ការ​វាយ​ប្រហារ​តាម​អាកាស​ស៊ីប​គោល​ដៅនៅទីក្រុង Deir ez-Zor ប្រទេសស៊ីរីនៅថ្ងៃនេះ។ ការ​វាយ​ប្រហារ​ស៊ីប​គោល​ដៅទាំ​ង​នេះ​មានគោលបំណងការពារកងកម្លាំងសហរដ្ឋអាមេរិកមិនឲ្យត្រូវបានវាយប្រហារ ដូចការ​វាយប្រហារកាលពីថ្ងៃទី១៥ ខែសីហា លើ​បុគ្គលិក​សហរដ្ឋ​អាមេរិក​ដោយ​ក្រុម​គាំទ្រ​ដោយ​អ៊ីរ៉ង់។ យោងតាមសេចក្តីថ្លែងការណ៍បានឲ្យដឹងថា លោក Biden បាន​ផ្តល់​ការ​ណែនាំ​សម្រាប់​ការ​វាយ​ប្រហារ​ទាំង​នេះ ស្របតាមសិទ្ធិអំណាចមាត្រា II របស់លោក ដើម្បីការពារបុគ្គលិកអាមេរិក មិន​ឲ្យ​រងការវាយប្រហារដោយក្រុមគាំទ្រដោយអ៊ីរ៉ង់។

សហរដ្ឋ​អាមេរិ​ក​បានកំណត់គោលដៅលើលេណដ្ឋានដែលប្រើសម្រាប់ការផ្ទុកគ្រាប់រំសេវ និង​ការ​គាំទ្រ​ផ្នែក​ដឹកជញ្ជូនដោយក្រុមគាំទ្រដោយអ៊ីរ៉ង់នៅក្នុងប្រទេសស៊ីរី។