ប្រព័ន្ធផ្សព្វផ្សាយប្រទេសថៃ បានរាយការណ៍នៅថ្ងៃពុធនេះថា តុលាការ​ធម្មនុញ្ញ​បាន​ផ្អាក​តំណែង​នាយក​រដ្ឋមន្ត្រី លោក Prayuth Chan-o-cha ពីកាតព្វកិច្ចផ្លូវការ ដោយ​រង់ចាំ​លទ្ធផល​ពិនិត្យ​ផ្លូវ​ច្បាប់​អំពី​ការកំណត់អាណត្តិកាន់តំណែងរបស់លោក។ ប្រព័ន្ធផ្សព្វផ្សាយ ThaiPBS, Khaosod និង Workpoint បាន​រាយការណ៍​ពី​សេចក្តី​សម្រេច​របស់​តុលាការ​ដោយ​មិនបានដកស្រង់ប្រភពឡើយ។

សារព័ត៌មានReuters មិនអាចទាក់ទងភ្លាមៗទៅកាន់ការិយាល័យនាយករដ្ឋមន្ត្រី និង​មន្ត្រី​រដ្ឋាភិបាល​ផ្សេង​ទៀត ដើម្បីសុំការបញ្ជាក់បាននោះទេ។

តុលាការធម្មនុញ្ញរបស់ប្រទេសថៃ បានបោះឆ្នោតសំឡេងគាំទ្រ ៥ទល់នឹង៤ ក្នុង​ការ​បញ្ជា​ឲ្យ​ផ្អាក​តំណែង​លោក​នាយករដ្ឋមន្រ្តី លោក Prayuth Chan-o-cha ។

តុលាការធម្មនុញ្ញរបស់ប្រទេសថៃត្រូវបានគេរំពឹងថានឹងធ្វើការប្រកាសជាផ្លូវការក្នុងពេលឆាប់ៗនេះ។ លោក ប្រាយុទ្ធ ចាន់អូចា បានឡើងកាន់តំណែងក្នុងឆ្នាំ ២០១៤ នៅពេល​ដែល​លោក​បាន​ដឹក​នាំ​រដ្ឋប្រហារផ្តួលរំលំរដ្ឋាភិបាលជាប់ឆ្នោត។

យោងតាម​គណៈរដ្ឋមន្ត្រីបានឲ្យដឹងថាឧបនាយករដ្ឋមន្ត្រី លោក Prawit Wongsuwan អាយុ 77 ឆ្នាំ ជាអតីត​មេបញ្ជាការកងទ័ព និងជាអ្នកនយោបាយយូរឆ្នាំ ទំនងនឹងក្លាយ​ជា​នាយករដ្ឋ​មន្ត្រី​បណ្តោះ​អាសន្ន ។