ឧត្តរមានជ័យ៖ លោក ផួង លីណា ប្រធានមន្ទីរបរិស្ថានខេត្តឧត្តរមានជ័យ រួមទាំងព្រះសង្ឃដែលគ្រប់គ្រង់នៅតំបន់សហគមន៍ដែនជម្រកសត្វព្រៃសង្ឃរុក្ខាវន្ត័ បានអំពាវនាវដល់ប្រជាពលរដ្ឋដែលជាព្រានតែងតែលបលួចចូលបរបាញ់ និងប្រម៉ាញ់ ដាក់អន្ទាក់សត្វព្រៃគ្រប់ប្រភេទនៅក្នុងតំបន់សហគមន៍ដែនជម្រកសត្វព្រៃសង្ឃរុក្ខាវន្ត័ ត្រូវតែបញ្ឈប់រាល់សកម្មភាពទាំងអស់នេះជាបន្ទាន់ បើមិនដូច្នេះនោះទេនឹងត្រូវទទួលទោសតាមផ្លូវច្បាប់។
លោក ផួង លីណា បានបន្តថា កន្លងមកបើទោះបីជាមន្ត្រីបរិស្ថាន រួមទាំងព្រះសង្ឃបានធ្វើការសហការគ្នា ក្នុងការការពារទប់ស្កាត់រាល់សកម្មភាពបទល្មើសនានា ក្នុងតំបន់សហគមន៍ដែនជម្រកសត្វព្រៃសង្ឃរុក្ខាវន្ត័នេះយ៉ាងណាក៏ដោយក៏ នៅតែមានបុគ្គលខិលខូចមួយចំនួនតូចនៅតែលបលួចបន្តធ្វើសកម្មភាពបទល្មើស កាប់ព្រៃឈើ និងបរបាញ់ ដាក់អន្ទាក់សត្វគ្រប់រូបភាព។ លោកបានបញ្ជាក់ថា កត្តាទាំងអស់នេះហើយដែលជាបញ្ហាមួយ ប្រឈមគួរឲ្យមានការបារម្ភខ្លាំងក្នុងការការពារធនធានធម្មជាតិ និងសត្វព្រៃដែលមានផ្សេងៗទៀតក្នុងតំបន់នេះ អាចនឹងមានការបាត់បង់នូវប្រភេទសត្វដ៏កម្រនៅថ្ងៃខាងមុខបន្តទៀត ដោយសារតែពួកព្រានតែងតែលបលួចធ្វើសកម្មភាពនោះ។ ហើយជាក់ស្ដែងនៅថ្ងៃទី៤ នេះដែរក្រុមល្បាតបានចុះល្បាតក្នុងព្រៃ ទើបប្រទះឃើញសត្វឈ្លូសមួយក្បាលដែលកំពុងជាប់អន្ទាក់នៅក្នុងព្រៃជ្រៅ បានជួយសង្គ្រោះទាន់ពេលដើម្បីដោះចំណងឲ្យមានសេរីភាពក្នុងព្រៃវិញផងដែរ៕
អត្ថបទ៖ ឃិន សារិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
