ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ ក្នុងមួយឆ្នាំរកចំណូលបានប្រមាណ ១៥០លាន​ដុល្លារ​អាមេរិក ក្នុងនោះ ចំណូលដែលផ្តល់សេវាមិនមែនពន្ធបានចំនួនក្នុងរង្វង់ ៣០លានដុល្លារអាមេរិក និងចំណូល ដែល​ប្រមូល​ដោយអង្គភាពពន្ធដារ ដែលស្ថិតនៅក្រោមប្រតិបត្តិការរបស់ក្រសួងដែនដី មានចំនួនប្រមាណ ១២០ លានដុល្លារអាមេរិកផងដែរ។

ឯកឧត្តម សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លើកឡើង​នៅក្នុង​សន្និសីទ​សារព័ត៌​មាន ស្តីពីសមិទ្ធផលសម្រេចបានរយៈពេល ៥ឆ្នាំ កន្លងមក របស់ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី២៤ ខែសីហា ឆ្នាំ២០២២ នេះថា ក្រសួងរៀបចំដែនដី នគរូបនីយកម្ម និងសំណង់ គឺជាស្ថាប័នដែលផ្តល់​សេវា​សា​ធារណៈជូន​ប្រជាពរដ្ឋលើវិស័យដីធ្លី និងវិស័យសំណង់ ក្នុងនោះចំពោះចំណូល​ដែលបានពីកម្រៃសេវា​សាធារណៈ​ដូចជា ការជួលអចលនទ្រព្យ និងពន្ធលើការផ្ទេរអចលនទ្រព្យ បើគិតក្នុងរយៈពេល ៥ឆ្នាំ គឺចាប់ពីឆ្នាំ ២០១៨ ដល់ខែ ៦ ដើមឆ្នាំ ២០២២ នេះ មានទំហំទឹកប្រាក់សរុបប្រមាណជាង ២ ២៣៦ ប៊ីលានរៀល ត្រូវប្រមាណ​ជាង ៥០០ លានដុល្លារដអាមេរិក។

ឯកឧត្តម បន្តថា ពាក់ព័ន្ធការផ្តល់សេវានេះ ប្រសិនគិតក្នុងរយៈពេលមួយឆ្នាំៗវិញ ក្រសួងរកចំណូល​បានពីការផ្តល់​សេវា​សាធារ​ណៈជូនប្រជាពលរដ្ឋ ក្នុងរង្វង់ប្រមាណជាង ៣០លានដុល្លារអាមេរិក ជាចំណូលមិនមែនសារពើរពន្ធ, ចំណែក​ចំណូលដែលជាសារពើរពន្ធ ដែលប្រមូលដោយអង្គភាពពន្ធដារ នៃក្រសួងសេដ្ឋកិច្ច និងហិរញ្ញវត្ថុ ដែល​ស្ថិត​ក្រោមការប្រតិបត្តិដោយផ្ទាល់របស់ក្រសួងរៀបចំដែនដី នគរូបនីយកម្ម និងសំណង់ មានក្នុងរង្វង់ប្រមាណ ១២០ លានដុល្លារអាមេរិក, បើគិតសរុបក្នុងមួយឆ្នាំៗ ក្រសួងដែនដីរកចំណូលបានប្រមាណក្នុងរង្វង់ ១៥០លានដុល្លារ​អាមេរិ​ក សម្រាប់ចំណូលចូលថវិការជាតិ។

​សូមបញ្ជាក់ថា៖ ជុំវិញការផ្តល់សេវាសាធារណៈ គិតត្រឹមរយៈពេល ៦ខែឆ្នាំ២០២២ នេះ ក្រសួងរៀបចំដែនដី នគរូ​ប​នី​យ​កម្ម និងសំណង់ បានផ្តល់សេវារួមមាន៖ ការផ្តល់សេវាសុរិយោដី មានទំហំទឹកប្រាក់ជាង ៣១ប៊ីលានរៀល, សេវា​លើវិស័យសំណង់ជាង ២៤ប៊ីលានរៀល, ការជួលអចលនទ្រព្យ ១១ប៊ីលានរៀល និងពន្ធលើការ​ផ្ទេរ​អចលនទ្រព្យ ជាង ១០៦ ប៊ីលានរៀល សរុបទាំងអស់មានចំនួនប្រមាណជាង ១៦២ ប៊ីលានរៀល៕ អត្ថបទ៖ សុន រ៉ាឌី