​ភ្នំពេញ៖ ស្ថិតក្នុងគម្រោងសម្តេចតេជោសម្រាប់សកម្មភាពមីន សភាពាណិជ្ជកម្មអឺរ៉ុបប្រចាំកម្ពុជា នៅថ្ងៃទី២៤ ខែ​សីហា​នេះ សន្យាគៀងគររកថវិកាពីសមាជិក ដើម្បីចូលរួមចំណែកសម្អាតមីននៅកម្ពុជា។ ការសន្យានេះ ធ្វើឡើង​ក្នុង​ពិ​ធី​​ចុះMOU រវាអាជ្ញាធរមីន និងសភាពាណិជ្ជកម្មអឺរ៉ុប ស្ថិតនៅទីស្នាក់ការអាជ្ញាធរមីន។

​ឯកឧត្តម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងលោក តាស់ស៊ីឡូ ប្រនសើ (Tassilo Brinzer) ប្រធាន​សភាពាណិជ្ជកម្មអឺរ៉ុបនៅកម្ពុជា នាថ្ងៃទី២៤ខែសីហានេះ បានអញ្ចើញចូលរួមក្នុងពិធីចុះMOU ភាពជាដៃគូ​សហ​ការណ៍​គ្នា ដើម្បីគៀងគររកថវិការចូលរួមក្នុងគម្រោងសម្តេចតជោសម្រាប់សកម្មភាពមីន។

នៅក្នុងឱកាសនោះលោក តាស់ស៊ីឡូ បានសំដែងការកោតសសើរ ចំពោះអាជ្ញាធរកម្ពុជា​ដែលបានខិតខំបោសសម្អាត​មីន​ផ្តល់​​ដីសុវត្ថិភាពជូនប្រជាពលរដ្ឋ និងចូលរួមចំណែកបញ្ចូនកងកម្លាំង ទៅសម្អាតមីននៅតាម​បណ្តាប្រទេស​មួយទៀត។

ក្រៅពីនេះ លោកប្តេជ្ញាគៀងគររកថវិកាពីសមាជិកសភាពាណិជ្ជកម្មអឺរ៉ុប ដើម្បីចូលរួមចំណែកសម្អាតមីននៅកម្ពុជា។ក្នុង​នាមសម្តេចតេជោ ប្រធានអាជ្ញាធរមីន ឯកឧត្តម ទេសរដ្ឋមន្រ្តី លី ធុជអនុប្រធានទី១ អាជ្ញាធរមីន មានប្រសាសន៍​ដែរ​ថា ក្នុងរយៈពេល៣០ឆ្នាំ នៃដំណើរការបោសសម្អាតមីនមនុស្សធម៌នៅកម្ពុជា បានចូលរួមចំណែក​ជាច្រើនក្នុងការ​ផ្តល់​ដី​សុវត្ថិភាព កាត់បន្ថយអត្រាគ្រោះថ្នាក់ដោយសារមីន និងការអភិវឌ្ឍប្រទេសជាតិ ជាពិសេសការងារបោសសម្អាត​មីន បានរួមចំណែកដល់កិច្ចគាំពារដល់សន្តិភាពនៅកម្ពុជា។

ក្រៅពីនេះ ឯកឧត្តម ទេសរដ្ឋមន្រ្តី បានថ្លែងអំណរគុណដល់សភាពាណិជ្ជកម្មអឺរ៉ុបប្រចាំកម្ពុជា រាប់បញ្ចូល​ទាំង​សកម្មភាព​សម្អា​តមីន និងការបង្កើតរោងចក្រនៅកម្ពុជាផ្តល់ការងារដល់ប្រជាពលរដ្ឋជាដើម។ គិតចាប់ពីឆ្នាំ១៩៩២ ដល់ឆ្នាំ២០២១ ផ្ទៃដីទំហំជាង២ពាន់គីឡូម៉ែត្រក្រឡា ត្រូវបានបោសសម្អាតអស់មីន សម្រាប់យកទៅប្រើប្រាស់ និងបង្កបង្កើនផល ដោយប្រជាពលរដ្ឋទទួលផលមានជាង៧លាននាក់៕ អត្ថបទ៖ទូច សោភ័ណ