ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងធនធានទឹក និងឧតុនិយម ក្នុងរយៈពេល៥ឆ្នាំ ២០១៨-២០២២២ បានធ្វើការអភិវឌ្ឍប្រព័ន្ធធារាសាស្ត្រ តូចធំនៅទូទាំងប្រទេស បានចំនួនជាង ២០០គម្រោង ដោយបានពង្រីកការដាំដុះដំណាំស្រូវប្រាំង វស្សា និងដំណាំរួមផ្សំផ្សេងៗ បាន​ជាង​ ១២​ម៉ឺនហិកតា និងជាប្រប្រយោជន៍ប្រចាំថ្ងៃរបស់ប្រជាពលរដ្ឋ ។

ក្នុងសន្និសីទសារព័ត៌មានស្តីពី សមិទ្ធផលសម្រេចបានរយៈពេល ៥ឆ្នាំ របស់ក្រសួងធនធានទឹក និងឧតុនិយម ឯកឧត្តម ប៊ុន ហ៊ាន រដ្ឋលេខាធិការក្រសួង មានប្រសាសន៍ថា ក្រៅពីថវិការបស់​រាជរដ្ឋាភិបាល ក្នុងការអភិវឌ្ឍប្រព័ន្ធធារាសាស្ត្រនេះ ក៏មានប្រទេសដៃគូមួយចំនួន ចូលរួមផងដែរ ក្នុង​នោះមានប្រទេសចិន ចំនួន៣គម្រោង, កូរ៉េខាងត្បូងចំនួន ៣គម្រោង, ជប៉ុន ១គម្រោង, អូស្ត្រាលី ៥គម្រោង, ទីភ្នាក់ងារអភិវឌ្ឍបារាំង (AFD) ៣គម្រោង និង ADB ជាច្រើន​គម្រោង​ទៀត​។

ឯកឧត្តមបានបន្តថា ក្រសួងក៏បានធ្វើការជួសជុលកែលម្អនូវប្រព័ន្ធធារាសាស្ត្រ បានជា​ច្រើន​គម្រោង​ទៀត រួមទាំងការបង្កើតសហគមន៍កសិករប្រើប្រាស់ទឹក បានចំនួន៧៨សហគមន៍ ដើម្បី​ប្រើប្រាស់ទឹកឲ្យមានតម្លាភាព ។

ឯកឧត្តម ប៊ុន ហ៊ាន បានបន្ថែមថា ទន្ទឹមនេះ ក្រសួងធនធានទឹក បានសាង​សង់​នូវ​ទំនប់​ការពារ​ទឹក​ជំនន់មួយ១គម្រោង ការពារលំនៅដ្ឋានរបស់ប្រជាពល់រដ្ឋចំនួន១០០គ្រួសារ នៅស្រុកពញាឭ ខេត្តកណ្ដាល ហើយក៏បានជួសជុលថែទាំទំនប់ ចំនួន៥គម្រោង រក្សានិរន្តភាព​ការពារ​បាន​ផ្ទៃ​ដី​សរុប​ចំនួន ជិត៦ពាន់ហិកតា លំនៅដ្ឋានជាង ១ម៉ឺនគ្រួសារ នៅខេត្តកណ្ដាល និងរាជធានីភ្នំពេញ ៕ អត្ថបទ បាន សុខរិទ្ធិ