ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងធនធានទឹក និងឧតុនិយម បានសាងសង់​នូវ​ប្រព័ន្ធ​ធានារាស្ត្រតូច មធ្យម និងធំជាច្រើនកន្លែង នៅទូទាំងប្រទេស ដោយប្រព័ន្ធ​ស្រោចស្រព​ទាំងអស់នោះ ​មានលទ្ធភាពក្នុងការផ្គត់ផ្គង់ទឹកលើវិស័យកសិកម្ម​ បានប្រមាណ ៦១ភាគរយ ។

ក្នុង​សន្និសីទ​សារព័ត៌មានស្តីពី ​សមិទ្ធផល​សម្រេចបានរយៈពេល ៥ឆ្នាំ ​នៃក្រសួងធនធានទឹក និង​ឧតុនិយម នៅថ្ងៃទី២៥ ខែសីហា ឆ្នាំ២០២២ ឯកឧត្តម ប៊ុន ហ៊ាន រដ្ឋលេខាធិការក្រសួង មាន​ប្រសាសន៍ថា ​កម្ពុជាកំពុងបន្តជំរុញការអភិវឌ្ឍ ​និងការអនុវត្តន៍ផែនការគ្រប់គ្រង​ធនធានទឹកចម្រុះ ដើម្បី​ពង្រីកការផ្គត់ផ្គង់​ទឹកបានគ្រាប់គ្រាន់​ តាមតម្រូវការ ​កាត់បន្ថយជាអតិបរិមានូវហានិភ័យ បណ្ដាល​ពីគ្រោះទឹកជំនន់ ​និងគ្រោះរាំងស្ងួត ព្រមទាំងធានាសន្តិសុខទឹករយៈពេលវែង ក្រសួង​បានអនុវត្ត និងសម្រេចបាននុវសមិទ្ធផលសំខាន់ៗយ៉ាងច្រើន​គូជាទីមោទនៈភាព ។

ឯកឧត្តម បានបន្តថា ដោយរហូតមកដល់ពេលនេះ នៅកម្ពុជាមានប្រព័ន្ធធារាសាស្ត្រជាច្រើន សម្រាប់​ស្រោចស្រព​ដំណាំ​កសិកម្ម ​និងការប្រើប្រាស់ប្រចាំថ្ងៃរបស់ប្រជាពលរដ្ឋ ក្នុងនោះមាន​ទំនប់ទឹកធំៗ ក៏បានត្រូវ​សាងសង់​ឡើង​នៅតាមបណ្ដាខេត្តមួយចំនួន​ មាននៅខេត្តបាត់ដំបង ពោធិ៍សាត់ ព្រះវិហារ បន្ទាយមានជ័យ ឧត្តរមានជ័យ និងនៅខេត្តកំពង់ស្ពឺជាដើម ដោយប្រភព​ទឹកកទាំង​អស់នោះ ​អាចស្រោចស្របដំណាំកសិកម្ម ​បានជាង ១លាន ៨សែនហិកតា ដែលស្មើនឹង ៦១ភាគរយ នៃផ្ទៃដីដាំដុះ ។

ឯកឧត្តម បានបន្ថែមថា ​សម្រាប់ការអភិវឌ្ឍនូវប្រព័ន្ធធារាសាស្ត្រនៅកម្ពុជា គឺមានការប៉ះពាល់​តិចតួច​បំផុត ហើយរាជរដ្ឋាភិបាលក៏បានធ្វើការដោះស្រាយ ជូនប្រជាពលរដ្ឋដែលប៉ះពាល់ ខណៈប្រព័ន្ធស្រោចស្របទាំងអស់នោះ មានផលប្រយោជន៍ជួយលើកស្ទួយវិស័យសេដ្ឋកិច្ច​នៅ​កម្ពុជា បានធំធេងណាស់ ។

ឯកឧត្តមរដ្ឋលេខាធិការ បានបញ្ជាក់ថា ជាគោលដៅបន្ត ក្រសួងគ្រប់គ្រងធនធានទឹក​ឲ្យបានល្អ​ប្រសើរ​ ទាំងនៅពេលមានទឹកជំនន់ ​និងពេល​ជួបគ្រោះរាំងស្ងួត, បន្តអភិវឌ្ឍទំនប់អាងស្ដុក​ទឹក​នៅ​តាមបណ្ដាស្ទឹងសំខាន់ ​ដែលមានសក្ដានុពល, បន្តពង្រឹងការគ្រប់គ្រងទឹក ការប្រើប្រាស់ និង​ការថែទាំសំណង់ការងារទឹក ប្រកបដោយប្រសិទ្ធផាពខ្ពស់​ និងមាននិរន្តភាព ៕

អត្ថបទ៖ បាន សុខរិទ្ធិ