ភ្នំពេញ៖ ប្រព័ន្ធធារាស្ត្របែបទំនើបកម្មនៅទំនប់ដូនទ្រី ស្ថិតក្នុងស្រុករុក្ខាគិរី ខេត្តបាត់ដំបង ដែលមានព្រំប្រទល់នឹងខេត្តពោធិ៍សាត់ ដោយកសាងឡើងមានការទម្លុះភ្នំ បង្ហូរទឹកទៅដល់ពលរដ្ឋ បែកខាងក្រោម សម្រាប់ស្រោចស្រពដំណាំកសិកម្ម និងប្រើប្រាស់ជាប្រយោជន៍ផ្សេងៗ សម្រេចបានការសាងសង់ប្រមាណ ៦០ភាគរយ និងគ្រោងបញ្ចប់ការសាងសង់ នៅឆ្នាំ២០២៤ ។

ក្នុងសន្និសីទសារព័ត៌មានស្តីពី សមិទ្ធសម្រេចបានរយៈពេល៥ឆ្នាំ របស់ក្រសួងធនធានទឹក និងឧតុនិយម នៅថ្ងៃទី២៥ ខែសីហា ឆ្នាំ២០២២ លោក ឡុង ផល្គុន ប្រធានមន្ទីរធនធានទឹកខេត្តបាត់ដំបង លើកឡើងថា នៅខេត្តបាត់ដំបង មានប្រព័ន្ធអាងទឹកធំចំនួន៤ គឺទី១. ប្រព័ន្ធធារាសាស្ត្រស្ទឹងមោងឫស្សី, ទី២. ប្រព័ន្ធស្ទឹងសង្កែ, ទី៣. ប្រព័ន្ធស្ទឹងបវេល និងទី៤. អាងកំពីងពួយ ។

លោកបានបន្តថា សម្រាប់ប្រព័ន្ធធារាសាស្ត្រស្ទឹងមោងនេះ គឺមានសាងសង់នូវទំនប់ស្ដុកទឹកដ៏ធំមួយ គឺទំនប់ដូនទ្រី ដែលសាងសង់ដោយកូរ៉េ អាងនេះមានសក្ដានុពលខ្លាំង មានលក្ខណៈស្វ័យប្រវត្តបែបទំនើបជាងគេនៅកម្ពុជា ហើយលទ្ធភាពរបស់វានឹងជួយស្រោចស្របដំណាំស្រូវវស្សាជាង ៤ម៉ឺនហិកតា និងស្រូវប្រាំងជាង ២ម៉ឺនហិកតា រួមទាំងដំណាំផ្សេងៗទៀត ដោយអាចស្ដុកទឹកបានជាង ១៦០លានម៉ែត្រគីប ។

លោក ឡុង ផល្គុន បានបន្ថែមថា ក្នុងប្រព័ន្ធធារាសាស្ត្រស្ទឹងមោងនេះ ក៏មានអាង និងទំនប់មួយចំនួនទៀត សម្រាប់ធ្វើការបែងចែកទឹក ក្នុងនោះមានអាងទំនប់បាសាក ទំនប់ព្រែកជីក ស្ថិតក្នុងស្រុករុក្ខគិរីដូចគ្នា និងទំនប់រាគន់ ក្នុងស្រុកមោងឫស្សី ដែលគាំទ្រអភិវឌ្ឍដោយជប៉ុន ហើយនៅពេលអាងស្តុកទំនប់ដូនទ្រីកសាងរួចរាល់ នឹងអាចនាំទឹកទៅផ្គត់ផ្គង់ នៅស្រុករុក្ខគិរី ស្រុកមោងឫស្សី និងមួយផ្នែកនៅស្រុកគាស់ក្រឡ ។

លោកប្រធានមន្ទីរបានបន្តទៀតថា នៅខេត្តបាត់ដំបងនេះ ក្រសួងធនធានទឹកក៏គ្រោងនឹងសាងសង់នូវប្រព័ន្ធធារាសាស្ត្រធំៗចំនួន២ទៀត មួយនៅស្ទឹងគ្រញូង ស្ថិតក្នុងស្រុកសំឡូត ជាប់ព្រំដែនដី សម្រាប់បង្ហៀរទៅទំនប់ពហុបំណងសេកសក់ និងមួយទៀត នៅស្ទឹងថ្វាក ស្ថិតក្នុងស្រុករតនមណ្ឌល ។

គួរបញ្ជាក់ថា នៅខេត្តបាត់ដំបង មានប្រព័ន្ធធារាសាស្ត្រសរុបជាង១០០ ក្នុងនោះប្រព័ន្ធខ្នាតធំចំនួន៦ (អាងកំពីងពួយ ទំនប់សេកសក់ និងកង្ហត់ជាដើម), ខ្នាតមធ្យមចំនួន៣៦ និងខ្នាតតូចចំនួន៦៥ ដោយឆ្នាំនេះបាត់ដំបង មានផែនការផ្ទៃដីដាំដុះដំណាំស្រូវជាង ៣៣ម៉ឺនហិកតា រួមនឹងដំណាំកសិកម្មជាច្រើនហិកតាទៀត ឆ្នាំនេះអនុវត្តការដាំដុះបានជាង ៦៧ភាគរយហើយ ៕. អត្ថបទ៖ បាន សុខរិទ្ធិ