ភ្នំពេញ៖ ការបោះផ្សាយមូលបត្ររបស់រដ្ឋ នឹងចាប់ពីខែ​កញ្ញា ឆ្នាំ២០២២​ខាងមុខនេះ ជា​ការបោះផ្សាយ​លក់​មូល​បត្រ​រដ្ឋ​ជា​លើកដំបូង​ក្នុងទំហំទឹកប្រាក់ជាង ១,២​ទ្រីលានរៀល សមមូលនឹងប្រមាណ ៣០០លានដុល្លារអាមេរិក។

ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីជូនដំណឹងដល់គ្រឹះស្ថានធនាគារ និងហិរញ្ញវត្ថុ, បេឡាជាតិរបបសន្តិសុខ​សង្គម និងក្រុមហ៊ុនធានារ៉ាប់រង ឲ្យបានជ្រាបថា ការអនុលោមតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ និង​ក្របខណ្ឌគោលនយោបាយបឋម ស្តីពីការភិវឌ្ឍមូលបត្ររដ្ឋរបស់រាជរដ្ឋាភិបាល ក្រសួងសេដ្ឋកិច្ច និងហិរញ្ញវត្ថុ តាម​រយៈធនាគារជាតិនៃកម្ពុជា ជាអាណត្តិគាហក (ការទទួលសិទ្ធិអំណាចពីភាគីម្ខាងទៀត) នឹងធ្វើការបោះ​ផ្សាយលក់​មូល​បត្រ​រដ្ឋជាលើកដំបូង ក្នុងទំហំទឹកប្រាក់ជាង ១,២ទ្រីលានរៀល សមមូលនឹងប្រមាណ ៣០០លានដុល្លារអាមេរិក ដោយនឹងចាប់ពីខែ កញ្ញា ឆ្នាំ២០២២ តទៅ។

តម្លៃចារឹកក្នុងមួយប័ណ្ណ ១ លានរៀល ដែលមានប្រភេទទួលបត្រ៖ ឥណប្រតិទាន (ការទូទាត់ឬកាលកំណត់) ១ឆ្នាំ, ៣ឆ្នាំ, និង៥ឆ្នាំ, និងការទូទាត់គូប៉ុង រៀងរាល់ ៦ ខែម្តង ដោយគិតចាប់ពីថ្ងៃបោះផ្សាយ។

ក្រសួងសេដ្ឋកិច្ច និងហិរញ្ញវត្ថុ លើកឡើងថា វិនិយោគិនមូលបត្ររដ្ឋ នឹងទទួលបានការលើកទឹកចិត្តរួមមាន ការ​លើក​ទឹក​ចិត្ត​ពន្ធដារ កាត់បន្ថយពន្ធកាត់ទុក ៥០ភាគរយ លើការប្រាក់ បានពីការកាន់កាប់ទិញ-លក់មូលបត្ររដ្ឋ និង​លើកលែង​ពន្ធលើ​ចំណេញ​មូលធន ចំពោះការទិញ និងជួញដូរមូលបត្ររដ្ឋ សម្រាប់រយៈពេល ៣ឆ្នាំ។

វិនិយោគិន ក៏នឹងត្រូវ ទទួលស្គាល់ការថ្លឹងហានិភ័យ ០ (សូន្យ) ភាគរយ ចំពោះមូលបត្ររដ្ឋដែលចារឹកជារូបិយវត្ថុជាតិ ឬជារូបិយប័ណ្ណ ក្នុងការគណនាអនុបាតសោធនភាព និងទទួលស្គាល់ជាទ្រព្យសកម្មសន្ទនីយដែលមានគុណភាពខ្ពស់ ចំពោះមូលបត្ររដ្ឋដែលចារឹកជារូបិយវត្ថុជាតិ ឬជារូបិយប័ណ្ណ ក្នុងការគណនាអនុបាតក្របខ័ណ្ឌសន្ទនីយភាព៕ អត្ថបទ៖ សុន រ៉ាឌី