ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានធ្វើការទូទាត់បើកប្រាក់ឈ្នួល និងប្រាក់អត្ថ​ប្រយោជន៍​ផ្សេង​ទៀត​ដល់​កម្មករ​និយោជិត រោងចក្រ ឃែនធើរេន អឺភែរឹល បានចំនួនប្រមាណ ៩០% នៃ​កម្មករនិយោជិតសរុប ៤២០នាក់។

​ឯកឧត្ដម ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅក្រោយចប់កិច្​ចប្រជុំ​ប្រាក់​ឈ្នួលអប្បបរមាសម្រាប់ឆ្នាំ២០២៣ កាលពីរសៀលថ្ងៃទី២៤ សីហា ឆ្នាំ២០២២កន្លងទៅថា តាមរយៈថវិកា​បុរេ​ប្រទា​ន​ជាមុនរបស់រដ្ឋាភិបាល ក្រសួងការងារបានដោះស្រាយជូនកម្មករនិយោជិតចំនួនប្រមាណ៩០% ។

ឯកឧត្តមបានឲ្យដឹងទៀតថា ទន្ទឹមនឹងដំណោះស្រាយនេះដែរ ចំពោះកម្មករនិយោជិតដែលមិនទាន់មានការងារធ្វើ ក្រសួង​បានណែ​នាំការងារមួយចំនួនជូនពួកគាត់ ដើម្បីដោះស្រាយជីវភាពក្នុងការរស់នៅ។

​ពាក់ព័ន្ធសំណងខាងលើនេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា បាននិយាយថា នេះជា​ផ្នែក​មួយ ជួយសម្រួលទៅដល់ការលំបាករបស់កម្មករ ខណៈដែលពួកគេមិនដឹងថា ទៅទាមទារពីថៅកែ ឬអ្នកគ្រប់គ្រង​នៅ​ទីណា បើគេរត់បាត់ ដូច្នេះគឺរដ្ឋបានរួមចំណែកក្នុងការផ្តល់ប្រាក់នេះ គឺជារឿងមួយដែលល្អបំផុតដែលលោកសាទរ និង​គាំទ្រ។

កាលពីសប្តាហ៍កន្លងទៅ ប្រមុខរាជរដ្ឋាភិបាលកម្ពុជា បានប្រកាសឲ្យក្រសួងការងារ និងបណ្តុះបណ្តាលវិជ្ជាជីវៈ ចាត់ចែង​ប្រើ​ប្រាស់​ថវិកាបុរេប្រទានដើម្បីទូទាត់សំណងជូនកម្មករ កម្មការនី រោងចក្រ ឃែនធើរេន អីភែរឹល ខេមបូឌា ស្ថិត​នៅ​សង្កា​ត់​ចោមចៅទី១ ខណ្ឌពោធិ៍សែនជ័យ រាជធានីភ្នំពេញជាមុន បន្ទាប់ពីកម្មកររោងចក្រខាងលើ បានដាក់ញត្តិ​ទៅ​ខុទ្ទកាល័យ​សម្តេច​តេជោ ហ៊ុន សែននាយករដ្ឋមន្ត្រីនៃកម្ពុជា សុំអន្តរាគមន៍ ករណីថៅកែបិទរោងចក្រដោយ​មិនបាន​បើក​ប្រាក់​ឈ្នួល និង​ទូទាត់អត្ថប្រយោជន៍ផ្សេងៗជូនពួកគាត់តាមផ្លូវច្បាប់៕ អត្ថបទ៖ ឈិត បូរ៉ាវី