ភ្នំពេញ៖ ឯកឧត្តម ជា ជាតិ អនុរដ្ឋលេខាធិការក្រសួងអប់រំ យុវជន និងកីឡា បានបញ្ជាក់ថា រាជរដ្ឋាភិបាល បានចាត់ទុកគ្រឹះស្ថានសិក្សាឯកជនបានរួមចំណែកយ៉ាងសំខាន់ ក្នុងការអភិវឌ្ឍធនធានមនុស្សនៅកម្ពុជា។

ការថ្លែងរបស់ឯកឧត្តម ជា ជាតិ យ៉ាងដូច្នេះ ក្នុងពិធីម្ពោធសាលាអាមេរិកកាំងហ្គោលឌិនហ្គេតសាខាភ្នំពេញថ្មី នៅព្រឹកថ្ងៃទី២៥ ខែសីហា ឆ្នាំ២០២២នេះ។

ឯកឧត្តម បានលើកឡើងទៀតថា រាជរដ្ឋាភិបាលបាននិងកំពុងយកចិត្តទុកដាក់ខ្ពស់ទៅលើវិស័យអប់រំ ដែលជា​វិស័យ​អាទិភាពមួយដ៏សំខាន់ ដោយហេតុថាវិស័យនេះ គឺជាឆ្អឹងខ្នងសម្រាប់ទ្រទ្រង់ការអភិវឌ្ឍន៍សេដ្ឋកិច្ចជាតិ ព្រម​ទាំង​ការ​អភិវឌ្ឍវិស័យដទៃទៀត។

ទន្ទឹមនឹងនោះឯកឧត្តម បណ្ឌិតសភាចារ្យរដ្ឋមន្រ្តី ក្រសួងអប់រំ បានធ្វើកំណែទម្រង់ជាបន្តបន្ទាប់ធ្វើឱ្យ គ្រឹះស្ថាន​សិក្សា​ទាំង​ផ្នែក​សាធារណៈ និងផ្នែកឯកជនមានការរីកដុះដាលយ៉ាងខ្លាំងដែលនេះ គឺជាមូលដ្ឋានគ្រឹះដ៏ចាំបាច់ សម្រាប់​ឈាន​ទៅពង្រឹងគុណភាពអប់រំឲ្យកាន់តែប្រសើរថែមទៀត។

ឯកឧត្តម ជា ជាតិ បាន​សង្កត់ធ្ងន់​ថា ជាក់​ស្តែងការ​ដាក់សម្ពោធឱ្យដំណើរការសាលាអាមេរិកាំងហ្គោលឌិនហ្គេត​សាខា​ភ្នំពេញ​ថ្មីនេះ គឺជាសក្ខីភាព ដែលឆ្លុះបញ្ចាំងពីវឌ្ឍនភាពភាពរីកលូតលាស់ភាពជោគជ័យ នៃវិស័យ​អប់រំ​របស់សាលានៅកម្ពុជាយើង។

បើតាមឧកញ៉ា ហេង សុគន្ធា អគ្គនាយិកាសាលាអាមេរិកាំងហ្គោលឌិនហ្គេត បានឲ្យដឹងថា ដោយមើល​ឃើញ​ពី​សារៈ​សំខាន់​ក្នុងវិស័យអប់រំនេះ សាលាអាមេរិកកាំងហ្គោលឌិនហ្គេត បានរួមចំណែកក្នុងការអភិវឌ្ឍនៅកម្ពុជា ជាពិសេស​ពង្រឹង​ចំណេះដឹងទូទៅជាមូលដ្ឋាន និងជំនាញភាសាបរទេស ដែលនាំឲ្យកុលបុត្រកុលធីតាយើងមានសមត្ថភាព ក្នុង​ភាព​ជាអ្នកដឹកនាំ និងប្រជាពលរដ្ឋប្រកបដោយគតិបណ្ឌិតទៅថ្ងៃអនាគតដែលមិនអាចខ្វះបាន។

ការបើកសាខាភ្នំពេញថ្មីនេះ ដើម្បីឆ្លើយតបទៅនឹងការគាំទ្ររបស់មាតាបិតា អ្នកអាណាព្យាបាលសិស្ស និង​សិស្សា​នុ​សិស្ស ដែលបានចុះឈ្មោះបុត្រធីតាចូលរៀនមានការកើនឡើងជាលំដាប់ពីមួយឆ្នាំទៅមួយឆ្នាំ។

ឧកញ៉ា ហេង សុគន្ធា អគ្គនាយិកា បានបញ្ជាក់ទៀតថា ដើម្បីឆ្លើយតបទៅនឹងការគាំទ្រ និងការ​ផ្ដល់ទំ​នុកចិ​ត្តពី​សំ​ណាក់​អាណាព្យាបាល មាតាបិតាសិស្សានុសិស្ស ចំពោះសាលានាពេលឆាប់ៗខាងមុខនេះ សាលានឹងបើកការដ្ឋាន​សា​ង​សង់​សាខាថ្មីមួយ​ទៀត នៅលើផ្ទៃដីទំហំ ៥ហិកតាស្ថិតនៅលើបណ្ដោយមហាវិថីសម្ដេច ហ៊ុន សែន(ផ្លូវ៦០ម៉ែត្រ)៕ ​​អត្ថបទ៖ រដ្ឋា