កណ្ដាល៖ នៅព្រឹកថ្ងៃទី​២៦ ខែសីហា ឆ្នាំ ២០២២នេះ ​អនុសាខាកាកបាទក្រហមកម្ពុជា ស្រុកកៀនស្វាយ​ ខេត្តកណ្ដាល ​ចុះចែកអំណោយមនុស្សធម៌ ​ជូនប្រជាពលរដ្ឋជាង ២០០គ្រួសារ​ ក្រោមវត្តមានលោកអភិបាលស្រុកលោក ឡូវ សុខសាន ប្រធានអនុសាខាកាកបាទក្រហមកម្ពុជា ស្រុកកៀនស្វាយ​ ។

ពិធីចែកអំណោយមនុស្សធម៌ ធ្វើឡើងនៅភូមិព្រែកស្វាយ២ ឃុំឈើទាល ស្រុកកៀនស្វាយ ខេត្តកណ្ដាល អនុសាខាកាកបាទក្រហមកម្ពុជា ស្រុកកៀនស្វាយ សហការជាមួយសប្បុរសជន លោកឧកញ៉ា ហុក គីមសាន និងលោកជំទាវ ប៉ូ សាកុល និងលោកជំទាវ គួច សាយអេង ត្រូវជាម្ដាយលោកឧកញ៉ា ហុក គីមសាន ​ព្រមទាំងមានការចូលរួមពីអាជ្ញាធរភូមិឃុំ និងកម្លាំងសមត្ថកិច្ចប៉ុស្ដិ៍ឈើទាលផងដែរ។

ក្នុងពិធីនេះ លោកអភិបាលស្រុកលោក ឡូវ សុខសាន បានថ្លែងថា បានណែនាំដល់​អាជ្ញាធរ​មូលដ្ឋាន ត្រូវសហការមន្ទីរសុខាភិបាល ធ្វើការផ្សព្វផ្សាយដល់ប្រជាពលរដ្ឋ ឱ្យមកទទួលការចាក់​វ៉ាក់សាំង​នេះឱ្យបានគ្រប់ៗគ្នា និងត្រូវមានការផ្សព្វផ្សាយ ឱ្យបានទូលំទូលាយ​នូវវិធានសុវត្ថិភាព ជូនដល់ប្រជាពលរដ្ឋឱ្យ បានយល់ដឹងកាន់តែច្បាស់បន្ថែមទៀត។

លោកអភិបាលស្រុក បានបន្ដទៀតថា វ៉ាក់សាំងការពារជំងឺកូវីដ១៩ ដែលចាក់ជូនបងប្អូនប្រជាពលរដ្ឋនាពេលនេះ គឺបានមកដោយការខិតខំប្រឹងប្រែងគ្រប់បែបយ៉ាងពីប្រមុខរាជរដ្ឋាភិបាលកម្ពុជា ក្នុងការស្វែង​រកវ៉ាក់សាំង ដើម្បីចាក់ជូនប្រជាពលរដ្ឋនៅក្នុងទូទាំងប្រទេសឱ្យបានគ្រប់ៗគ្នា សំដៅបង្ការ ទប់ស្កាត់ កុំឱ្យមានការឆ្លងរីករាលដាលពាក់ព័ន្ធជំងឺដ៏កាចសាហាវនេះ។

ស្របពេលជាមួយគ្នានេះលោក ឡូវ សុខសាន ក៏បានអំពាវនាវ​ដល់បងប្អូនប្រជាពលរដ្ឋទាំងអស់ ត្រូវតែ​មកទទួលការចាក់វ៉ាក់សាំង ឱ្យបានគ្រប់ៗគ្នា និងបន្តចាក់ដូសជំរុញបន្ថែមទៀត ដើម្បីទប់ស្កាត់នៅមេរោគកូវីដ-១៩។

ជាមួយគ្នានោះផងដែរសមាជិកក្រុមប្រឹក្សាឃុំឈើទាល លោក ហែម ស៊ីវ៉ុន បាន​លើកឡើងថា ការ​ចែកអំណោយនេះ មិន​ប្រកាន់​ពណ៌​សម្បុរ ពូជសាសន៍ និន្នាការ​នយោបាយ​អ្វី​ឡើយ អំណោយ​នេះ​តិចតួច​ក្ដី តែអាចជួយដោះស្រាយជីវភាពដល់បងប្អូនប្រជាពលរដ្ឋបានមួយកម្រិតផងដែរ ។

សូមបញ្ជាក់ថា លោកឧកញ៉ា ហុក គីមសាន និងលោកជំទាវ ប៉ូ សាកុល និងលោកជំទាវ គួច សាយអេង ត្រូវជាម្ដាយលោកឧកញ៉ា ហុក គីមសាន បានរួម​ចំណែក​ក្នុងការជួយដល់កិច្ចការ​មនុស្សធម៌​ជាច្រើនតាមរយៈផ្ដល់អំណោយជូនពលរដ្ឋក្រីក្រ ចូលរួមក្នុងវិស័យសុខាភិបាល វិស័យ​ព្រះពុទ្ធសាសនា វិស័យអប់រំ និងការស្ថាបនា​ហេដ្ឋា​រចនាសម្ព័ន្ធនានា ដើម្បីរួមចំណែកជាមួយ​រាជ​រដ្ឋាភិបាលក្នុង​ការអភិវឌ្ឍសេដ្ឋកិច្ច​នៅទីជនបទ។ អំណោយមនុស្សធម៌ដែលបានផ្ដល់ប្រជាពលរដដ្ឋ ក្នុងមួយគ្រួសារ​ទទួលបាន អង្ករ២៥គីឡូក្រាម ,ទឹកត្រី ០១យួរ ,ត្រីខ០១យួរ ,ភួយ០១ និងថវិកាចំនួន ២០០០០រៀលផងដែរ៕អត្ថបទ៖ សាវី