ភ្នំពេញ៖ ក្រសួងធនធានទឹក និងឧតុនិយម តាមរយៈអ្នកនាំពាក្យអះអាងថា កម្ពុជារឺពិភពលោក គឺគ្មានការជន់លិចធ្ងន់ធ្ងរបំផុតនោះទេ ក្នុងសប្ដាហ៍នេះ សប្ដាហ៍ក្រោយ រឺជាច្រើនឆ្នាំបន្ទាប់ក្ដី។ នេះជាការអះអាង ស្របពេលដែលបុគ្គលជាអ្នកនយោបាយកម្ពុជាមួយរូប បានផ្សព្វផ្សាយថា នឹងមានការជន់លិចកម្ពុជាកម្រិតធ្ងន់ធ្ងរ។ ការផ្សព្វផ្សាយនេះ បង្កឱ្យមានការភ្ញាក់ផ្អើលដល់ពលរដ្ឋ ដោយបុគ្គលនោះ អោយពលរដ្ឋរត់ភៀសខ្លួនទៅខេត្តសៀមរាប តាមការប្រាប់ខ្លួន។

ឯកឧត្តម ចាន់ យុត្ថា អ្នកនាំពាក្យក្រសួងធនធានទឹក និងតុនិយម បាន​បញ្ចេញ​សារ​បដិសេធ​ភ្លាមៗ​ថា ​តាមការសិក្សាបែបវិទ្យាសាស្រ្ត ​គឺកម្ពុជាក៏ដូចជាប្រទេសដទៃទៀត គឺគ្មានការជន់លិច​ធ្ងន់ធ្ងរ ដូចការ​ផ្សព្វផ្សាយបែបអបិយជំនឿនោះទេ។ ឯកឧត្តមអះអាងបែបនេះ ដោយលើកឡើងនូវអំណេះអំណាងពីរចំណុច។

ចំណុចទី១, គឺភ្លៀងត្រូវការពេលវេលា ក្នុងការកកើត ពុំមែនភ្លៀងអាចបន្តធ្លាក់រាប់អាទិត្យ រឺរាប់ខែនោះទេ។ ទោះករណីព្យុះក៏មានរយៈពេល ​និងមានទិសដៅផងដែរ មិនមែន​មាន​ឥទ្ធិពល​ខ្លាំងរហូតនោះទេ។

ចំពោះចំណុចទី២,ដែលឯកឧត្តម អះអាងថា ​កម្ពុជានិងពិភពលោក មិនអាចមានការជន់លិចទាំង​ស្រុងនោះ ​គឺដោយសារតាមការព្យាករណ៍របស់អ្នកវិទ្យាសាស្រ្តសិក្សាឃើញថា បើករណីកម្ដៅ​លើផែនដី​បន្តឡើងកម្ដៅ បង្កឱ្យរលាយទឹកកក​ កើនឡើងកម្ពស់ទឹកសមុទ្រ​ ក៏ស្ថិតនៅចន្លោះឆ្នាំ ២១០០ ​មិនមែនបច្ចុប្បន្ននោះទេ។ ​ហើយការលិចនោះ ​ក៏ពុំមែនលិចគ្មានកន្លែងជ្រកនោះទេ គ្រាន់​តែបង្កផលប៉ះពាល់ដល់ដីកសិកម្ម ​ដែល​បង្កដោយកម្ពស់ទឹកសមុទ្រ។

ក្នុងនាមជាអ្នកជំនាញពឹងផ្អែកលើការសិក្សាបែបវិទ្យាសាស្រ្ត ឯកឧត្តមស្នើសុំបញ្ជាក់ទៅប្រជាពលរដ្ឋ កុំឱ្យជឿការឃោសនា ​បែបទេវកថា​ ដែលគ្មានការសិក្សា គ្មានអំណះអំណាងបែបនេះ៕

អត្ថបទ៖ គឹមហុក