ភ្នំពេញ៖ បណ្តាញសង្គមស៊ីវិលកម្ពុជា ត្រូវបានប្រកាសបើកដំណើរការជាផ្លូវការ នៅថ្ងៃទី២៦ ខែសីហានេះ គឺដើម្បីតាមដាន និងជាកញ្ចក់ចូលរួមកែលម្អការអនុវត្តច្បាប់របស់រាជរដ្ឋាភិបាល។

លោក ទុំប៉ែន វីរៈវីទូ ប្រធានបណ្តាញសង្គមស៊ីវិលកម្ពុជា ​បានឱ្យដឹងថា​ បណ្តាញសង្គមស៊ីវិល ត្រូវបានបង្កើតឡើង ដើម្បីជួយគ្នាទៅវិញទៅមក រវាងអង្គការក្រៅរដ្ឋាភិបាល ជាមួយរាជរដ្ឋាភិបាល ដែល សំដៅរួមចំណែកដល់ការអភិវឌ្ឍជាមួយរាជរដ្ឋាភិបាល​ ដូចជាការចូលរួមតាក់តែងច្បាប់ ជាដើម។

លោក បានបន្តថា ក្នុងនាមបណ្តាញសង្គមស៊ីវិលកម្ពុជា ​នឹងដើរតួនាទីពាំនាំនូវកង្វល់របស់អង្គការ សង្គមស៊ីវិល ​ដើម្បីជាកញ្ចក់ឆ្លុះបញ្ចាំង​ សម្រាប់ការចូលរួមកែលម្អ នៃការអនុវត្តច្បាប់របស់​រាជ​រដ្ឋាភិបាល។

លោក ទុំប៉ែន វីរៈវីទូ បានបញ្ជាក់ថា បណ្តាញសង្គមស៊ីវិលកម្ពុជា បានត្រៀមខ្លួនរួចរាល់ក្នុងការ ចូលរួមតាមដានលើការអនុវត្តរបស់គណៈកម្មាធិការជាតិរៀបចំការបោះឆ្នោត (គ.ជ.ប) ស្តីពី​ការរៀបចំការ បោះឆ្នោតជ្រើសតាំងតំណាងរាស្រ្ត ​នីតិកាលទី៧ នៅឆ្នាំក្រោយ ហើយការចូលរួម​សង្កេតនេះ នឹងក្លាយជា សក្តានុពលបន្ថែម ​ឆ្លុះបញ្ចាំង​ពីការអនុវត្តត្រឹមត្រូវ របស់គ.ជ.ប ៕

អត្ថបទ៖ សេក ឧត្តម