ភ្នំពេញ៖ បច្ចុប្បន្ននៅរាជធានីភ្នំពេញ និងនៅខេត្តកណ្តាលសំគាល់ឃើញថា ពលរដ្ឋក្មេងចាស់បាន​ចាក់វ៉ាក់សាំងដូសមូលដ្ឋានបានលើសពី១០០% ​ហើយដើម្បីពង្រឹងភាពសុំានៅក្នុងខ្លួន និង​ទប់ស្កាត់​ការរាតត្បាតកូវីដ១៩ ​នៅពេលនេះ ​បណ្តាពលរដ្ឋក្មេង ចាស់គឺបានបន្តចាក់វ៉ាក់សាំងដូសជម្រុញ​ដែល​មានគន្លាតបីខែម្តង តាមការណែនាំគ្រូពេទ្យជាធម្មតា។

បើតាមបណ្តាពលរដ្ឋដែលបានចាក់វ៉ាក់សាំងនៅមន្ទីរបង្អែកច្បារអំពៅរាជធានីភ្នំពេញ និងនៅ​មន្ទីរពេទ្យបង្អែកជ័យជំនះ ខេត្តកណ្តាលបានថ្លែងប្រាប់BTVនៅថ្ងៃទី២៦ ខែសីហានេះថា បច្ចុប្បន្នមេរោគកូវីដ១៩ និងមេរោគអូមីក្រុងប្រភេទថ្មី នៅមិនទាន់ផុតរលត់ចេញពីសហគមន៍ និង​ពីប្រទេសកម្ពុជាអស់នោះទេ​ ហើយមានតែបន្តប្រុងប្រយ័ត្នពាក់ម៉ាស់ ​រក្សាគន្លាត ​ឧស្សាហ៍លាងដៃ ជាពិសេសបន្តការចាក់វ៉ាក់សាំងដូសជម្រុញដើម្បីពង្រឹងភាពស៊ាំនៅក្នុងខ្លួន ​ការពារឆ្លងឈឺធ្ងន់ធ្ងរ ពីជំងឺគកូវីដ១៩ ។

បើតាមតំណាងគ្រូពេទ្យចាក់វ៉ាក់សាំងនៃមន្ទីរពេទ្យបង្អែកច្បារអំពៅ ថ្លែងថា​ ពីមួយថ្ងៃទៅមួយថ្ងៃ នៅ​មន្ទីរបង្អែកច្បាអំពៅ បានទទួលពលរដ្ឋមកចាក់វ៉ាក់សាំងជាហូរហែររៀងរាល់ថ្ងៃ ហើយនៅក្នុង​ដំណើរ​ការ​ចាក់វ៉ាក់សាំងដូសជម្រុញនេះ ពលរដ្ឋមកចាក់ដូសទី៤ និងដូសទី៥ ហាក់មាន​យឺតយ៉ាវ​បន្តិច។

បើតាមវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ ថ្លែងថា នៅពេលបច្ចុប្បន្ន នៅទូទាំងរាជធានីភ្នំពេញ ​មានទីតាំងចាក់វ៉ាក់សាំងកូវីដ១៩ មានប្រមាណជិត៥០ទីតាំង ហើយមួយ​ថ្ងៃ​ទៅមួយថ្ងៃទទួលពលរដ្ឋទៅចាក់វ៉ាក់សាំងជាមធ្យមបាន ៣០០០នាក់ ខណៈទូទាំងរាជធានី​ភ្នំពេញ​ការចាក់ដូសមូលដ្ឋានចាប់ពីក្មេងអាយុ៣ឆ្នាំរហូតដល់១៨ឆ្នាំឡើងទៅ ចាក់បានលើសគោល​ដៅ២លាននាក់ ក្នុងនោះការចាក់ដូសទី៣ជូន​មនុស្សចាប់ពី​៣ឆ្នាំឡើងចាក់បាន៩៦% ហើយ​បច្ចុប្បន្ន​យើង​កំពុងជម្រុញការចាក់ដូសទី៤ និង​៥នៅតាមមន្ទីរពេទ្យផង និងពង្រីកការចាក់តាមខ្នង​ផ្ទះតាមសហគមន៍​ និងតាមរោងចក្រជាដើម។

ដោយឡែកនៅឯ ​ខេត្តកណ្តាល បើតាមវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្ត​កណ្តាល ថ្លែងថា ពីមួយទៅមួយថ្ងៃមានពលរដ្ឋក្មេងចាស់ទៅចាក់វ៉ាក់សាំង​ដូសជម្រុញជាមធ្យម​បានប្រមាណ ១០០០នាក់​ ហើយក្រុមពេទ្យក៏បានពង្រីកការចាក់ចុះទៅដល់ខ្នងផ្ទះ និង​តាមទីប្រជុំជន។

សម្រាប់ដូសមូលដ្ឋាននៅខេត្តកណ្តាលក្រុមពេទ្យចាក់បាន១លាន១សែននាក់ លើសគោលដៅ​គ្រោង​ទុក១០០% ខណៈការចាក់ដូសទី៣ធ្វើបាន៩២% ​ដូសទី៤ចាក់បាន២៨% និងដូសទី៥ចាក់២.៦៥%៕ អត្ថបទ ស៊ុម សុខជា