បាល់ទាត់៖ គណៈកម្មការប្រកួតបាល់ទាត់ជាតិកម្ពុជា-CNCC បានសម្រេចលើកការប្រកួតសន្សំពិន្ទុសប្ដាហ៍ទី៦ នៃលីគកំពូលកម្ពុជាជាបណ្ដោះអាសន្ន ដើម្បីផ្ដល់ឱកាសឲ្យមន្ត្រី និងកីឡាករនៃក្លិបបាល់ទាត់អាជីពទាំងអស់ ធ្វើការចាក់វ៉ាក់សាំងបង្ការជំងឺកូវីដ-១៩ ដែលទទួលបានការអនុញ្ញាតពីក្រសួងសុខាភិបាល។
យោងតាមការជូនដំណឹងរបស់អង្គភាពទទួលបន្ទុក រៀបចំព្រឹត្តិការណ៍បាល់ទាត់ថ្នាក់ជាតិនេះ បានបញ្ជាក់ថា គណៈកម្មការប្រកួតបាល់ទាត់ជាតិកម្ពុជា បានទទួលវ៉ាក់សាំងពីក្រសួងសុខាភិបាល តាមការស្នើសុំសម្រាប់ចាក់ជូនមន្ត្រី និងកីឡាករនៃក្លិបបាល់ទាត់អាជីព ខណៈការចាក់លើកទី១ ត្រូវបានកំណត់ចាក់នៅថ្ងៃទី០៩-១០ ខែមេសាខាងមុខ។ ប៉ុន្ដែដោយសារកាលបរិច្ឆេទចាក់វ៉ាក់សាំងនេះ ជាន់គ្នាជាមួយកម្មវិធីប្រកួតលីគកំពូលកម្ពុជាសប្ដាហ៍ទី៦ ដែលគ្រោងប្រកួតនាថ្ងៃទី១០-១១ ខែមេសា CNCC សម្រេចលើកការប្រកួតជាបណ្ដោះអាសន្ន ដើម្បីផ្ដល់ឱកាសឲ្យមន្ត្រី និងកីឡាករបានទទួលការចាក់វ៉ាក់សាំង តាមការកំណត់របស់ក្រសួងសុខាភិបាល ខណៈកាលបរិច្ឆេទថ្មីនៃការប្រកួតលីគសប្ដាហ៍ទី៦ CNCC នឹងជូនដំណឹងតាមក្រោយ។ នេះគឺជាដំណឹងល្អមួយសម្រាប់ក្លិប និងកីឡាករដែលកំពុងហ្វឹកហាត់ និងប្រកួតលើសមរភូមិវាលស្មៅនៃលីគកំពូលកម្ពុជា ចំពោះមុខស្ថានភាពដ៏តានតឹងនៃការរីករាលដាលជំងឺកូវីដ-១៩ ក្នុងសហគមន៍ ក្រោមការយកចិត្តទុកដាក់របស់រាជរដ្ឋាភិបាល ដើម្បីផ្ដល់នូវភាពកក់ក្ដៅដល់ក្លិប និងកីឡាករ ក្នុងការប្រកួតប្រជែងដោយទំនុកចិត្ត និងមានភាពកក់ក្ដៅ បន្ទាប់ពីទទួលបាននូវវ៉ាក់សាំងការពារជំងឺដ៏កាចសាហាវនេះ។
យ៉ាងណាមិញមុនឈានដល់ការពន្យាពេលការប្រកួតសប្ដាហ៍ទី៦ ក៏ត្រូវឆ្លងកាត់ការប្រកួតសប្ដាហ៍ទី៥ ដែលនឹងប្រព្រឹត្តទៅរយៈពេល ៣ថ្ងៃនៅដើមសប្ដាហ៍នេះ រួមមាននៅរសៀលថ្ងៃទី៥ ខែមេសានេះ ក្រុមសូលទីឡូអង្គរនឹងបើកទ្វារកីឡដ្ឋាន RSU ទទួលក្រុមភ្ញៀវកងយោធពលខេមរភូមិន្ទ ខណៈនៅថ្ងៃទី៦ ខែមេសាស្អែកមាន ៣គូគឺក្រុមគិរីវង់ជួបក្រុមភ្ញៀវខេត្តព្រៃវែង, ក្រុមអគ្គិសនីកម្ពុជាបើកទ្វារផ្ទះទទួលក្រុមណាហ្គាវើលដ៏ ខណៈគូឯកប្រចាំសប្ដាហ៍ក្រុមបឹងកេត ត្រូវជួបក្រុមភ្នំពេញក្រោននៅកីឡដ្ឋានខេមបូឌាអ៊ែរវ៉េ។ ចំណែកនៅថ្ងៃទី៧ ខែមេសាមាន ២គូគឺក្រុមអាស៊ីអឺរ៉ុបបើកទ្វារផ្ទះ ទទួលក្រុមព្រះខ័នរាជស្វាយរៀង និងក្រុមនគរបាលជាតិជួបក្រុមអង្គរថាយហ្គឺរ នៅកីឡដ្ឋានអគ្គិសនីកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
